ბრიტნი სპირსს ბავშვი არ უშვილებია, მიუხედავად იმისა, რომ ცოტა ხნის წინ ამის შესახებ ინსტაგრამზე განაცხადა. 12 ივლისს გავრცელებულ პოსტში სპირსი ამტკიცებდა, რომ მან „პატარა ლამაზი გოგონა” იშვილა.
„მისი სახელია ლენონ ლონდონ სპირსი,” – დაწერა მომღერალმა თავისი ცეკვის ვიდეოზე. „დღეს ლენონს საყვარელი კაბა აცვია!!! მასზე წერია: მე აქ ახალი ვარ!!!”
მას შემდეგ „ბილბორდმა” დაადასტურა, რომ სპირსს რეალურად ბავშვი არ უშვილებია. როგორც ჩანს, ის ამ ხნის განმავლობაში ფანებს „ტროლავდა”.
მუსიკოსი უკვე არის ორი ვაჟის დედა. ყოფილ ქმართან, კევინ ფედერლაინთან, მას 20 წლის შონი და 18 წლის ჯეიდენი ჰყავს. პოსტამდე რამდენიმე კვირით ადრე სპირსმა სარკეში გადაღებული სელფი გამოაქვეყნა ჯეიდენთან ერთად, რომელიც ცნობილ დედას უკვე სიმაღლეში უსწრებს.
„ახლა ის 6’3-ია სიმაღლეში და მისი ხელები ძალიან დიდია,” – წერდა სპირსი ინსტაგრამზე. “კიდევ რამდენი ხანი უნდა ვიყო შოკში??? ეს სიგიჟეა, სასაცილოც კი არ არის!!! იღბლიანი ვარ!!! უბრალოდ გთხოვთ, ჩემს გულსაც გაუფრთხილდით!”
მიუხედავად იმისა, რომ სპირსის განცხადება, თითქოს ბავშვი იშვილა, მოულოდნელი იყო, ეს არ ყოფილა პირველი შემთხვევა, როცა მან სოციალურ მედიაში ისეთი რამ დაწერა, რაც სიმართლე არ აღმოჩნდა. გასულ დეკემბერს მომღერალმა გამომწერებს უთხრა, რომ „ბოროტი” პაპარაცებისგან თავის დასაღწევად საცხოვრებლად მექსიკაში გადადიოდა. თუმცა, როგორც შემდგომ The Hollywood Reporter-მა დაადასტურა, პოპვარსკვლავი რეალურად არსად წასვლას არ აპირებდა.
თვეების შემდეგ კი სპირსი კვლავ ალაპარაკდა საცხოვრებლის შეცვლაზე. გოგონას შვილად აყვანის პოსტში ის ასევე წერს. „გადავწყვიტე, იტალიაში გადავბარგდე.”
