ცნობილი ქვიარ არტისტი ჯორჯ ალან ო’დაუდი, სასცენო სახელით Boy George, 1980-იანი წლების დასაწყისში ცნობილი გახდა თავისი ანდროგინული იმიჯით და მკვეთრი მაკიაჟით. 11 ივლისს გამოცემა The Times-თან ინტერვიუში 64 წლის ჯორჯმა თანამედროვე ქვიარ საზოგადოებაში ფესვგადგმული „იდენტობის პოლიტიკა“ გააკრიტიკა. „არ ვფიქრობ, რომ ეს ვინმეს დაეხმარა. ჩვენ არ ვართ ერთნაირები,“ – განუცხადა მან გამოცემას. „ყველა უნიკალურია, რადგან არავინაა ზუსტად ისეთი, როგორიც სხვა.“
იმ დროს, როცა ამერიკის მოქმედი ადმინისტრაცია ცდილობს ტრანსგენდერი ადამიანების უფლებების შეზღუდვას და ქვიარ თემის მიმართ გაზრდილია ყურადღება, Boy George ამბობს, რომ რეალობა და ინტერნეტში წარმოდგენილი სურათი ერთმანეთისგან მკვეთრად განსხვავდება. „არსებობს ინტერნეტის სამყარო – მახინჯი და სიბრაზით სავსე – და არის რეალური ცხოვრება, სრულიად სხვა. ასე რომ, სინამდვილეში, ხალხს არაფერი აქვს სანერვიულო.“
ჯორჯის შეფასებით, ადამიანების სექსუალობისა და იდენტობის მიმართ გამოჩენილი ყურადღება ნებისმიერი მხარისგან არაჯანსაღია. „როცა 17 წლის ვიყავი, ინტერვიუში ვთქვი: იყო გეი, იგივეა, რაც ჩიფსების ჭამა – საერთოდ არ არის მნიშვნელოვანი. ახლაც ასე ვფიქრობ. რატომ უნდა გაინტერესებდეს სხვისი სექსუალობა, თუ მასთან სექსს არ აპირებ?“
ჯორჯი 2020 წელს ტრანსფობიაში დაადანაშაულეს, როცა ტვიტერზე დაწერა: „გთხოვთ, თქვენი ნაცვალსახელებიც კართან დატოვეთ.“ თუმცა მას შემდეგ ის საჯაროდ დაუპირისპირდა ჰარი პოტერის ავტორს, ჯეი ქეი როულინგს და ტრანს ადამიანების უფლებები დაიცვა. როულინგი უარყოფს ტრანსფობიას, თუმცა სოციალურ მედიაში არაერთ ანტიტრანსგენდერულ მოსაზრებას ავრცელებს და აქტიურად უჭერს მხარს ინიციატივებს, რომლებიც ტრანსი ქალების სპორტში მონაწილეობას და გენდერთან შესაბამის საზოგადოებრივ ტუალეტებში შესვლას ზღუდავს. გასულ თვეში, როდესაც როულინგმა იკითხა: „რომელი უფლება წაართვეს ტრანს ადამიანებს?“ და დაამატა, რომ საკუთარი სიტყვის თავისუფლების შეზღუდვას გრძნობს, ჯორჯმა უპასუხა: „ის უფლება, რომ თავი დაანებონ მდიდარმა, მოწყენილმა ბულერებმა!“
არტისტი შეეხო 2002 წლის Tony Awards-ზე ნომინირებული მიუზიკლის, Taboo-ს გაცოცხლების გეგმებსაც. ეს სპექტაკლი ეძღვნება 1980-იანი წლების ლონდონურ ღამის კლუბს და მის დამფუძნებელს – ავსტრალიელ პერფორმანს არტისტსა და ღამის სცენის პროვოკატორს, ლი ბოუერს, რომელიც თავისი ექსპერიმენტული გარეგნობით თავად Boy George-ის შთაგონების წყაროდაც იქცა.
„მინდა, შოუმ ღრმად გააანალიზოს, როგორი უცნაური იყო ლის და მისი ცოლის, ნიკოლა ბოუერის ურთიერთობა. სანამ ტერმინი „არაბინარული” იარსებებდა, იყო გეი მამაკაცი, რომელმაც ჰეტეროსექსუალი ქალი შეირთო ცოლად და მათ შორის იყო ნამდვილი სიყვარული. დიახ, ნაწილობრივ იმიტომ დაქორწინდა, რომ ყველა გაეღიზიანებინა, მაგრამ ნამდვილად ვფიქრობ, რომ უყვარდა.“
ინტერვიუში არტისტმა ისიც აღნიშნა, რომ ბოუერის მსგავსად, ჯორჯიც იმ ეპოქის შვილია, როცა თვითგამოხატვის მთავარი იდეა პირადი სიმართლის ჩვენება იყო და არა მცდელობა, წარმოგედგინა ქვიარ, არაბინარული ან რაიმე სხვა იდენტობის მქონე მთელი ჯგუფი.
