Sexy bicycle-ის უახლესი ნაუშევარი COLOR CODE ერთგვარი მოგაზაურობაა ხმებისა და ფერების სამყაროში, სადაც მინიმალისტური ბითები და ემოციურად დატვირთული მელოდიები არტისტის – ნიკა ელიას უნიკალურ მუსიკალურ ხედვაში ერთიანდება.
ალბომში 10 კომპოზიციაა გაერთიანებული, რომელზეც მუშაობდნენ: ნიკა ელია, სანდრო ფოცხიშვილი, თემო ჭელიძე, ნოე ჭელიძე და პოლ მიჯანსი. ალბომის არტ ნამუშევარი კი თავად ნიკა ელიას ეკუთვნის.
„ალბომი, რომელზეც ბოლო რამდენიმე წელი ვმუშაობდით, საბოლოოდ გამოვიდა. ეს პროცესი მაშინ დავიწყე, როცა საკუთარ თავს ვუთხარი, რომ მუსიკისთვის თავი უნდა დამენებებინა და ჩვეულებრივი ცხოვრება დამეწყო. თუმცა გულწრფელად ამის მაშინაც არ მჯეროდა. მთელი ძალით ვცდილობდი, საკუთარი თავი მომეტყუებინა, ერთ-ერთ კომპანიაში არტ დირექტორადაც კი დავიწყე მუშაობა, მაგრამ საბოლოოდ მივხვდი, რომ მუსიკას მაინც ვერ ვშორდებოდი. შეიძლება, ეს ცოტა ტოქსიკურ ურთიერთობასაც ჰგავს, მაგრამ ახლა აი, ისევ აქ ვარ.
დღეს, ჩემი მარტო მუშაობის წლების და შემდგომ მეგობრებთან: თემო, სანდრო, ნოე, პოლი და კიდევ ბევრი სხვა, რომელთა გარეშე ეს ჩანაწერი უბრალოდ ვერ იარსებებდა, გამოვიდა ალბომი. ამაყი ვარ, რომ ამ მშვენიერი ქმნილების სამყაროში მოტანა შევძელი.
ვიცი, რომ ალბომის თავიდან ბოლომდე მოსმენა ბევრისთვის შეიძლება დღევანდელობაში რთული აღმოჩნდეს, მაგრამ ჩემთვის ეს მუსიკოსად ყოფნის არსებითი ნაწილია და მინდა ვთქვა, რომ მუსიკოსად ყოფნა ძალიან მომწონს.
ამიტომ, პირველ რიგში, მადლობა ჩემს თავს, რომ არ დავნებდი. ასევე უდიდესი მადლობა ყველას, ვინც ამ ალბომის შექმნა შესაძლებელი გახადა და კიდევ, გაუმარჯოს მომავალ ალბომებს, უფრო უკეთესებს, უფრო უცნაურებს და რა თქმა უნდა, ნამდვილად ჩვენებს.“
COLOR CODE ისეთ ატმოსფეროს ქმნის, სადაც მსმენელს საშუალება ეძლევა, საკუთარ ფერების კოდში იმოგზაუროს და შინაგანი სამყაროს ღრმა იმპულსური განცდები ამოატივტივოს.
მოისმინეთ Sexy bicycle-ის სიჩუმისა და ხმაურის, მინიმალიზმისა და ემოციური სიღრმის ნაზავი ალბომი COLOR CODE:
