ცოტა ხნის წინ ქართველმა არტისტმა მურმან წულაძემ სადებიუტო ალბომი – $habash გამოაქვეყნა, რომელიც 9 სიმღერას და ბონუს კომპოზიციას აერთიანებს. რამდენიმე კვირის წინ მუსიკოსმა ალბომში შესულ სიმღერაზე Guria კლიპი გამოაქვეყნა, დღეს კი Money-ს ვიდეოკლიპი გამოვიდა.
„Money-ს კლიპი ძალიან შინაურ ხალხთან ერთად გადავიღე, ჩემი და, თათია წულაძე თამაშობს, ჩემი ბავშვობის მეგობარი და მენეჯერი Pierre Dessy-ც, რომელმაც თავისი დიდი ბაბუის მანქანა მათხოვა ამ კლიპისთვის. ვიდეო ჩემი დის ერთ-ერთი საუკეთესო მეგობრის, Ianis Habert-ის გადაღებული და დამონტაჟებულია. ყველა, ვინც ამ პროექტზე იმუშავა ჩემი ახლო მეგობარია. პროდუსერი კი ჩემი ძმა, ლაშა წულაძეა.” – ამბობს მუსიკოსი.
მურმან წულაძის თქმით, მისი პირველი, სადებიუტო ალბომი განსაკუთრებული და პირადულია, სწორედ ამიტომ მასზე მუშაობა მხოლოდ იმ ადამიანებთან ერთად სურს, ვისთანაც ახლო ემოციური კავშირი აქვს:
„ჩემი პირველი ალბომი $habash რაღაცნაირად პირადულია და თან ჩემ ცხოვრებას ჰყვება, ამიტომ მინდა, მარტო ძალიან ახლო ხალხთან ვიმუშაო, რათა ეს შინაურობის განცდა იგრძნობოდეს.”
მუსიკოსის თქმით უახლოეს მომავალში გადაღებების გაგრძელებას გეგმავს: „ამ დღეებში დაიწყება Gelodebi-ს კლიპზე მუშაობა, ამჯერად საბა სორდიასთან ერთად, – INDIGO-ს ჟურნალისტთან, რომელიც Masters-ის ვიდეოს შექმნაში დამეხმარა.“
სიმღერა და კლიპი Guria კიდევ ერთი ახალი ნამუშევარია, რომელიც არტისტმა რამდენიმე კვირის წინ გამოაქვეყნა.
,,Guria-ს კლიპი ბებიის, ციური კობალავას სოფელში, ლანჩხუთის რაიონში გადავიღე. ის თავის დროზე მომღერალი იყო, ახალგაზდობაში ძმა მოუკლეს, ამის გამო მუსიკას თავი დაანება, რათა ოჯახისთვის მიეხედა. ეს კლიპი ჩემმა ბიძაშვილმა, გიორგი კობალავამ გადაიღო და დაამონტაჟა. ძალიან ბევრ რამეში დამეხმარა ბიძაჩემი ჭოლა კობალავა, რომელმაც გადაღების წინა დღეს მასწავლა მოტოციკლის მართვა, აქამდე მარტო მფრინავი ხალიჩების ტარება ვიცოდი. კლიპზე მუშაობა სამ დღეში დავასრულეთ, ის ჩემს ბებიას, ციური კობალავას ეძღვნება, რომელიც ცოცხალი აღარ არის.“ – ამბობს წულაძე.
მურმან წულაძის ახალი კლიპები მუსიკალურ ვიზუალიზაციასთან ერთად არტისტის პირადი ამბების ერთგვარი დოკუმენტური ასახვაცაა, რომელიც მისი ოჯახის წევრების და ახლობლების გარემოცვაში შეიქმნა. მისი თითოეული ნამუშევარი კი სითბოს, ნოსტალგიასა და ოჯახურ ურთიერთობებში ჩამოყალიბებულ ემოციურ კავშირებს გადმოსცემს.
