მას შემდეგ, რაც დოკუმენტური ფილმი Billy Joel: And So It Goes გამოვიდა, ბილი ჯოელმა საკუთარი არქივიდან ნამდვილი განძი გამოაქვეყნა. 60-წლიანი კარიერის მქონე გრემის მფლობელი არტისტის შესახებ შექმნილი დოკუმენტური ფილმის პრემიერა HBO-ზე 18 ივლისს შედგა. მეორე ნაწილი კი 25 ივლისს გამოვიდა.
პრემიერიდან რამდენიმე საათის შემდეგ კი სტრიმინგ პლატფორმებზე ფილმის „მუსიკალური თანამგზავრი” – 155-სიმღერიანი კოლექცია გამოქვეყნდა, რომელიც აქამდე უცნობ ექვსსაათნახევრიან მასალას მოიცავს.
კოლექციაში შედის მუსიკოსის ადრეული ჯგუფების – The Hassles-ისა და The Lost Souls-ის პერიოდის სიმღერები, ჯოელის ლაივ შესრულებები, როგორიცაა მისი გამოსვლა The Old Grey Whistle Test-ში და ასევე ჩანაწერები, რომლებიც Columbia Records-თან ხელის მოწერის პირველსავე დღეს გაკეთდა. კოლექციაში შევიდა ასევე Scenes From an Italian Restaurant-ის პირველი შესრულებაც.
„ყოველთვის მინდოდა, დამეწერა ერთგვარი კინემატოგრაფიული სიმღერა იმ ადამიანების ცხოვრებაზე, ვისაც სკოლაში ვიცნობდი,” – ამბობს ჯოელი აღნიშნულ სიმღერაზე. „ადამიანებზე, ვინც წარმატების ზენიტს ძალიან ადრე მიაღწიეს.”
მიუხედავად იმისა, რომ სინგლის სახით არასდროს გამოსულა, 8-წუთიანი სიმღერა იმავე წელს შევიდა ალბომში The Stranger და ჯოელის ერთ-ერთ ყველაზე აღიარებულ კომპოზიციად იქცა.
როგორც ახალი პროექტის პროდიუსერები ამბობენ, კოლექციას მომავალშიც დაემატება მსმენელისთვის უცნობი მუსიკა. „უამრავი მასალაა მის პირად არქივში, ასევე უამრავი მასალაა „სონის” არქივში და ისინი თითქმის არ ემთხვევა ერთმანეთს. მომდევნო წლებში ჩვენ ორივე არქივის ზედმიწევნით შესწავლას ვგეგმავთ.”
დოკუმენტური ფილმის პრემიერამდე რამდენიმე თვით ადრე ჯოელმა ყველა დაგეგმილი შოუ გააუქმა, ჰიდროცეფალიის დიაგნოზის გამო. „გულწრფელად ვწუხვარ, რომ მიწევს, გავაწბილო ჩემი მსმენელი. მადლობას გიხდით გაგებისთვის,” – დაწერა მან განცხადებაში.
განცხადება გაავრცელა მუსიკოსის გუნდმაც. მათი თქმით, ჯოელი ფიზიოთერაპიის სპეციალურ კურსს გაივლიდა ამ დიაგნოზის დასამარცხებლად, რომელმაც გავლენა მოახდინა მის სმენაზე, მხედველობაზე, ბალანსსა და საშემსრულებლო უნარებზე.
ჯოელმა ჯანმრთელობის მდგომარეობაზე განახლებული ინფორმაცია გულშემატკივარს 21 ივლისს ბილ მაერის პოდკასტში მიაწოდა. „თავს კარგად ვგრძნობ,” – თქვა მან. „ამბობენ, რომ ტვინის აშლილობა მაქვს, რაც უფრო მძიმედ ჟღერს, ვიდრე ამას თავად ვგრძნობ.”
