25 ივლისს პელტროუ ტექნოლოგიური კომპანია Astronomer-ის სახალისო სარეკლამო ვიდეოში გამოჩნდა. ვიდეოს წინ უძღოდა ვირუსულად გავრცელებული ინციდენტი, როდესაც Astronomer-ის აღმასრულებელი დირექტორი ენდი ბაირონი და საკადრო განყოფილების ხელმძღვანელი კრისტინ კაბოტი Coldplay-ს ბოსტონის კონცერტზე ე.წ. „კოცნის კამერაზე“ ერთად დააფიქსირეს.
მალევე კომპანიაში ორივე მათგანმა დატოვა თანამდებობა. შემდეგ კი Astronomer-მა გაავრცელა ვიდეო, სადაც პელტროუ, რომელიც 2003- 2016 წლებში Coldplay-ს სოლისტზე, კრის მარტინზე იყო დაქორწინებული, კომპანიის „დროებითი სპიკერის“ როლში გამოდის და თანამშრომელთა სახელით საუბრობს.
„მადლობა Astronomer-ით დაინტერესებისთვის,“ – ამბობს პელტროუ ვიდეოში. „მე დროებით დამიქირავეს, რათა Astronomer-ის 300-ზე მეტი თანამშრომლის სახელით ვილაპარაკო. ბოლო დღეებში კომპანიის მისამართით უამრავი კითხვა დაისვა და ჩემი მისიაა, მათ ვუპასუხო.“
ეკრანზე რამდენიმე კითხვა ჩნდება, მათ შორის: „თქვენი სოციალური მედიის გუნდი ამას როგორ უძლებს?“ – რაზეც პელტროუ იუმორით არიდებს თავს პასუხს და ტექნიკურ თემებზე გადადის. პელტროუ განმარტავს, რომ Astronomer არის კომპანია, რომელიც მონაცემთა სისტემასა და AI-ზე არის ფოკუსირებული. „სასიამოვნოა, რომ ამდენი ადამიანი უეცრად დაინტერესდა მონაცემთა ავტომატიზაციით,“ – აღნიშნავს მსახიობი.
როცა ეკრანზე მომდევნო კითხვა ჩნდება, პელტროუ კომპანიის სექტემბრის კონფერენციას აანონსებს: „ახლა დავუბრუნდეთ იმას, რაც საუკეთესოდ გამოგვდის – მომხმარებლებისთვის გარდამტეხი შედეგების მიწოდებას. მადლობა Astronomer-ით დაინტერესებისთვის,“ – ამბობს ის.
15 ივლისს Coldplay-მ კონცერტი გამართა ბოსტონის Gillette Stadium-ზე, სადაც კამერამ დააფიქსირა ბაირონი, რომელსაც ხელი ჰქონდა მოხვეული კაბოტისთვის. როგორც კი ორივემ კადრი შენიშნა, ბაირონი კამერის ხედვის არეალს სასწრაფოდ გაერიდა, კაბოტი კი სწრაფად შეტრიალდა. „შეხედეთ ამ ორს. ან საიდუმლო რომანი აქვთ, ან ძალიან მორიდებულები არიან,“ – იხუმრა კრის მარტინმა.
როგორც აღმოჩნდა, ორივე მათგანი სხვადასხვა ადამიანზეა დაქორწინებული და სწორედ ეს ინციდენტი გახდა მიზეზი, რომ მალევე კომპანიიდან ორივე წავიდა.
იხილეთ პელტროუს ვიდეო X-ზე:
Thank you for your interest in Astronomer. pic.twitter.com/WtxEegbAMY
— Astronomer (@astronomerio) July 25, 2025
