Depeche Mode: M – ასე ჰქვია სრულმეტრაჟიან ფილმს, რომელიც 2023 წელს მეხიკოში გამართული გრანდიოზული კონცერტების ქრონიკას გვთავაზობს. შოუები ჯგუფის ტურნეს, Memento Mori-ს ნაწილი იყო. ბენდმა 12 აგვისტოს დააანონსა, რომ Tribeca-ს კინოფესტივალზე ჩვენების შემდეგ, Trafalgar Releasing-თან და Sony Music Vision-თან თანამშრომლობით, ფილმის პრემიერა 28 ოქტომბრიდან კინოთეატრებსა და IMAX ეკრანებზე შედგება. Depeche Mode: M-ის ჩვენება მსოფლიოს 60-ზე მეტ ქვეყანაში, 2 500-ზე მეტ ეკრანზე იგეგმება. ბილეთების გაყიდვა 17 სექტემბრიდან დაიწყება.
„ჩვენი ახალი ფილმი ეხება ღრმა კავშირს, რომელიც მუსიკას, კულტურასა და ადამიანებს შორის არსებობს. ფილმის ავტორმა და რეჟისორმა, ფერნანდო ფრიასმა შესანიშნავად მოახერხა ამ ისტორიის მოყოლა მექსიკური კულტურისა და მეხიკოს კონცერტების გავლით,” – განაცხადა ვოკალისტმა დეივ გაჰანმა.
ფილმს, რომლის ავტორი და რეჟისორი ჯილდოს მფლობელი მექსიკელი კინემატოგრაფი ფერნანდო ფრიასია, ახასიათებენ როგორც „ექსპრესიულ და დინამიკურ კინემატოგრაფიულ გამოცდილებას.” ის 2023-2024 წლის Memento Mori-ს ტურნეს სამი კონცერტის მასალას აერთიანებს. მასშტაბური შოუები სრული ანშლაგით ჩატარდა და Foro Sol-ის სტადიონზე ათასობით მსმენელი გააერთიანა. ნამუშევარი მაყურებელს მუსიკალურ მოგზაურობაში ეპატიჟება. ფილმში კარგად ჩანს ბენდის გავლენა, რომელიც დროს უძლებს.
Depeche Mode-ის Memento Mori-ს ტურნე, რომელიც ჯგუფის მე-15 სტუდიური ალბომის მხარდასაჭერად ჩატარდა, Billboard-ის 2024 წლის ყველაზე შემოსავლიანი როკ-ტურნეების ათეულში მეცხრე ადგილზე მოხვდა. 63 კონცერტის ფარგლებში 910 000 ბილეთი გაიყიდა, საერთო შემოსავალმა კი თითქმის 125 მილიონ დოლარს მიაღწია.
