12 აგვისტოს კინოთეატრ „ამირანში“ Mechanical Rainbow-სა და გიორგი გიგაშვილის ერთობლივ სიმღერაზე გადაღებული კლიპის პრეზენტაცია გაიმართა. „მომენდე“ – ასე ჰქვია სიმღერას, რომლის ტექსტი და მელოდია Mechanical Rainbow-სა და გიორგი გიგაშვილს ეკუთვნით, ხოლო მიქსინგსა და მასტერინგზე ნიკალა ზუბიაშვილმა იმუშავა.
პრემიერა ფიზიკური ღონისძიების ფორმატით გაიმართა, რომლის ფარგლებშიც მუსიკალური ნომრები შეასრულეს გიორგი გიგაშვილმა, Nikala-მ და Mechanical Rainbow-მ. საღამოს დასკვნითი ნაწილი კი ახალი კლიპის ჩვენებას დაეთმო. ღონისძიება Cavea+-ის მხარდაჭერით გაიმართა.
როგორც Mechanical Rainbow-ს ვოკალისტმა დადუ დონაძემ Billboard Georgia-სთან საუბრისას აღნიშნა, სიმღერაზე მუშაობის პროცესი საკმაოდ სწრაფ ტემპში მიმდინარეობდა:
„ასე სწრაფად სიმღერა არ ჩაგვიწერია. სამუშაო პროცესი იყო ძალიან მოკლე და ამავდროულად ხალისიანი – სულ რაღაც სამი დღე დაგვჭირდა. ვიდეო კი ვინტაჟური ხელის კამერით, ე.წ. Handycam-ით ერთ დღეში გადავიღეთ. კლიპის ამ ფორმით ჩვენება ჩვენი ჯგუფისთვის ახალი და სასიამოვნო გამოცდილება იყო.“
გიორგი გიგაშვილი:
„ეს სიმღერა ჩემთვის ძალიან ძვირფასია, რადგან ბავშვური და გულწრფელი ენერგიის მატარებელია. Mechanical Rainbow-სთან თანამშრომლობა ძალიან სასიამოვნო და სახალისო აღმოჩნდა, რადგან ჯგუფის თითოეული წევრი არაჩვეულებრივი ადამიანია. მიხარია, რომ დღეს ეს პრემიერა შედგა და ამისთვის მადლობას ვუხდი Cavea+-ს.“
Mechanical Rainbow 2021 წელს ჩამოყალიბდა და მალევე იქცა ქართული მუსიკალური სცენის ერთ-ერთ გამორჩეულ ბენდად. ჯგუფს განსაკუთრებული პოპულარობა მოუტანა სიმღერებმა – HOPE და Sevdanarevi. 2024 წელს Mechanical Rainbow-მ Kordz-თან და სტეფანესთან ერთად წარმოადგინა კომპოზიცია „სდექ“, რომელიც 2024 წლის ზაფხულის ჰიტად იქცა.
