სანდრო ბიბიჩ კვაჭაძემ აკაპელა ვიდეოების ახალი სერია წარადგინა, რომელიც სხვადასხვა არტისტთან კოლაბორაციას მოიცავს. ამის შესახებ Billboard Georgia მუსიკოსს ესაუბრა:
„აკაპელა ხაზი ჩემს ცხოვრებაში დაახლოებით 7-8 წლის წინ გაჩნდა – მაშინ, როცა ჩემში მედიტაციური შეგრძნებები შემოვიდა. მომინდა, რომ მედიტაცია მუსიკაში შემეტანა. შემდეგ დავიწყე აკაპელა ალბომზე მუშაობა, რომელიც მალე გამოვა. ამ პროცესის განმავლობაში სოციალურ ქსელშიც ვაზიარებდი სხვადასხვა ჩანაწერებს. ახლა ამ სერიების შექმნა უფრო ინტენსიურად დავიწყე. გადავწყვიტე, რომ მეტი მასშტაბი მიმეცა და მასში ჩამერთო ის არტისტები, რომლებთანაც მეგობრობა მაკავშირებს და რომელთა ხმაც ჩემთვის ახლობელია. ასე მიიღო ამ სერიებმა ერთგვარი პროექტის სახე.”
როგორც სანდრო ბიბიჩ კვაჭაძე ამბობს, კოლაბორაციულ ვიდეო სერიებზე მუშაობა ცოცხალი პროცესია, სადაც მთავარ მიმართულებას შემოქმედებითი პროცესი და შთაგონება განსაზღვრავს.
„თანამშრომლობისას არტისტს ჩემი მხრიდან სრულ შემოქმედებით თავისუფლებას ვაძლევ. მას შეუძლია, აირჩიოს ნებისმიერი სიმღერა – საავტორო ან ქავერი. შემდეგ ის მიგზავნის მასალას, მე ემოციებით და შთაგონებით მივყვები პროცესს და ჰარმონიაზე ვიწყებ მუშაობას. ამ პროცესში ვიმედოვნებ, რომ არტისტიც მხარს დაუჭერს ჩემს იდეებს, რადგან გარკვეულ მომენტებში შესაძლოა აკორდი ან მელოდიის ხაზი შევცვალო.”
ამ ეტაპზე ვიდეო სერიიდან უკვე ორი ნამუშევარია გამოქვეყნებული – კოლაბორაცია ქეთო ნერგაძესთან და ნატუკა ნაცვლიშვილთან. როგორც სანდრო ბიბიჩ კვაჭაძე Billboard Georgia-სთან საუბრისას აღნიშნავს, შემდეგი ნამუშევარი ხატია ქორიძესთან თანამშრომლობით შეიქმნა, რომელიც მალე გამოქვეყნდება.
რაც შეეხება სანდრო ბიბიჩ კვაჭაძის დაანონსებულ აკაპელა ალბომს, ნამუშევრის სახელია “აკაპელა” და მასზე მუსიკოსი უკვე წლებია, მუშაობს.
„ალბომისთვის მასალა უკვე მზად მქონდა, როცა პანდემიის დროს გიორგი გვარჯალაძეს შევხვდი. Leno Records-ის ლაივ პერფორმანსების სერიების ფარგლებში შევასრულე რამდენიმე სიმღერა. ამის შემდეგ გვაჯიმ (გიორგი გვარჯალაძე) შემომთავაზა, რომ ეს ალბომი Leno Records-ის ლეიბლზე გამოგვეცა. ასე დაიწყო სამუშაო პროცესი. მიქსინგი და მასტერინგი თავად გვაჯის ეკუთვნის. პროექტზე 2020 წელსვე დავიწყეთ მუშაობა.”
ალბომში 6 სიმღერაა შესული. როგორც სანდრო ბიბიჩ კვაჭაძე აღნიშნავს, ეს მისთვის ყველაზე პერსონალური და გულწრფელი ნამუშევარია, სადაც თავის ენერგიას სრულად გადმოსცემს.
„ეს არის მედიტატიური ნამუშევარი, რომლის მოსმენისას საკუთარ შინაგან სამყაროში მოგზაურობაა შესაძლებელი.”
