22 აგვისტოს Lady Gaga მშობლიურ ქალაქ ნიუ-იორკში დაბრუნდა და Madison Square Garden-ზე ორსაათიანი შოუ გამართა. ეს პოპვარსკვლავის პირველი გამოსვლა იყო ამ ქალაქში მას შემდეგ, რაც 2022 წელს The Chromatica Ball-ის ფარგლებში MetLife Stadium-ზე წარდგა.
კონცერტის დროს Lady Gaga-მ შოუ შეაჩერა და გულშემატკივრებს ის მხარდამჭერი სიტყვები გაუზიარა, რომელიც სცენაზე გასვლის წინ საქმროსგან, მაიკლ პოლანსკისგან და ახლო მეგობრისგან მიიღო.
„მახსენდება, როგორ დავდიოდი ამ ქალაქის ქუჩებში, როგორ ვიბრძოდი ჩემი ოცნებების, ჩემი რწმენისა და საკუთარი თავისთვის. სანამ შოუ დაიწყებოდა, ჩემს მეგობარ ჩაინას ვუთხარი: მგონია, რომ მთელი ეს შოუ ბრძოლა უნდა იყოს, რადგან როცა ნიუ-იორკში ვარ, ყოველთვის ვიბრძვი. აქ ბრძოლით უნდა მოიპოვო ყველაფერი და საკუთარი თავი მაქსიმალურად გამოავლინო.”
Lady Gaga-ს თქმით, მეგობარმა მხარდამჭერი სიტყვებით გაამხნევა, რამაც მისი მიდგომა შეცვალა: „ზოგჯერ ბრძოლა არ არის საჭირო, უბრალოდ უნდა გამოჩნდე,“ – უთხრა Gaga-ს მეგობარმა. მომღერალმა და მსახიობმა საქმროს, მაიკლ პოლანსკის სიტყვებიც გაიხსენა: „სცენაზე გასვლის წინ ჩემმა საქმრომ, მაიკლმა მითხრა: როცა სცენაზე გახვალ, ეცადე, გულშემატკივრების ენერგია სრულად მიიღო”. ამ სიტყვების წარმოთქმის შემდეგ კი პოპვარსკვლავმა სიმღერა Hair შეასრულა, რომელიც 2011 წელს Billboard Hot 100-ის ჩარტში მე-12 ადგილზე გავიდა.
Lady Gaga-მ თავის მეორე ალბომს, Born This Way-ს განსაკუთრებული უწოდა და მისი შექმნის შთაგონებად სწორედ ნიუ-იორკი დაასახელა: „დარწმუნებული ვარ, ჩემი ვერცერთი ალბომი ვერ შეიქმნებოდა ნიუ-იორკის გარეშე, თუმცა Born This Way-ს შექმნა ნამდვილად შეუძლებელი იქნებოდა ამ ქალაქის გარეშე. ეს თქვენთვისაა, თქვენი ოცნებებისთვის და იმისთვის, რომ ხანდახან მართლა არ არის საჭირო ბრძოლა. უბრალოდ უნდა გამოჩნდეთ.”
Lady Gaga-ს ამ კონცერტით Madison Square Garden-ში ექვსდღიანი კონცერტების სერია დაიწყო, რომელიც არტისტის გლობალური ტურნეს, Mayhem Ball-ის ნაწილია.
ნახეთ 22 აგვისტოს შოუს საუკეთესო მომენტები აქ.
