სანდრო ნებიერიძე ფერუჩიო ბუზონის საერთაშორისო საფორტეპიანო კონკურსის ნახევარფინალისტია. ქართველი პიანისტი მსოფლიოს მასშტაბით 114 მონაწილიდან შეირჩა. კონკურსის შესარჩევი მოსმენები 2024 წლის ნოემბერში ფესტივალ The Glocal Piano Project-ის ფარგლებში 3 კონტინენტის 12 ქალაქში გაიმართა. სანდრო ნებიერიძემ მონაწილეობა მიუნჰენის მოსმენაში მიიღო, სადაც შოპენისა და რახმანინოვის ეტიუდები და შუმანის ტოკატა შეასრულა.
2024 წლის 10 დეკემბერს კონკურსში მონაწილე 34 ნახევარფინალისტი გამოცხადდა, რომელთა შორისაც სანდრო ნებიერიძეც დასახელდა. კონკურსი იტალიაში, ბოლცანოში 27 აგვისტოდან 7 სექტემბრის ჩათვლით იმართება. ამჟამად მიმდინარეობს ნახევარფინალური ეტაპი, რომელიც 29 აგვისტოს დასრულდება. შემდეგ ეტაპებზე ჯერ 12, შემდეგ კი 6 კონკურსანტი გადავა. 7 სექტემბერს კი გრანდ ფინალი გაიმართება, სადაც უკვე 3 ფინალისტი სცენაზე ჰაიდნის ორკესტრთან ერთად წარდგება.
ნახევარფინალური ეტაპის ფარგლებში სანდრო ნებიერიძემ კონკურსის პირველსავე დღეს დაუკრა. ქართველმა პიანისტმა ბუზონის, მენდელსონისა და სტრავინსკის ნაწარმოებები შეასრულა.
