კანიე უესტის შესახებ დოკუმენტური ფილმის, In Whose Name?-ის რეჟისორი ნიკო ბალიესტეროსია. ფილმი არტისტის 2018-2024 წლის პერიოდს ასახავს და სრულად iPhone-ით არის გადაღებული.
ტრეილერი კიმ კარდაშიანისა და კანიე უესტის ურთიერთობის იმ მონაკვეთსაც მოიცავს, როდესაც 2021 წელს კარდაშიანმა განქორწინებაზე შეიტანა სარჩელი და ასევე 2020 წლის კანიე უესტის წარუმატებელ საპრეზიდენტო კამპანიასაც.
„ყველაზე კარგი ის არის, რომ როდესაც ბიპოლარი და ამავდროულად ხელოვანი ხარ, ყველაფერი, რასაც აკეთებ და ამბობ, ხელოვნების ნიმუშად იქცევა,“ – ამბობს კანიე ტრეილერში.
დოკუმენტური ფილმი ნათლად წარმოაჩენს კანიე უესტის ავთენტურ სახეს, რათა მაყურებელს მისი რეალური მე წარუდგინოს, თუ რა ხდის კანიეს XXI საუკუნის ერთ-ერთ ყველაზე წინააღმდეგობრივ არტისტად.
ფილმში უამრავი ცნობილი სახის კამეოა, მათ შორის სტუდიური სესიები დრეიკთან, ფარელთან და სუიზ ბითსთან ერთად. ასევე ნაჩვენებია, როგორ გამოდის უესტი Playboi Carti-სა და მერლინ მენსონთან ერთად მაიამიში გამართულ Donda 2-ის საღამოზე.
„უნდა ამეფეთქებინა თუ არა Gap? უნდა ამეფეთქებინა თუ არა Adidas? – პასუხი დადებითია,” – ამბობს კანიე ტრეილერში და გულისხმობს კომპანიებთან მის განხეთქილებას, რომელიც 2022 წელს უესტის ანტისემიტურ განცხადებებს მოჰყვა.
დოკუმენტური ფილმი In Whose Name? აშშ-ში 1 000-მდე კინოთეატრში 19 სექტემბერს გამოვა. ფილმის პრესრელიზში ვკითხულობთ: „ეს არის დოკუმენტური ფილმი, რომელიც ექვსი წლის განმავლობაში იქმნებოდა, სადაც მსოფლიოს ყველაზე სკანდალურ არტისტზე 3 000 საათის მასალა ერთ ისტორიად არის მოყოლილი.”
ნახეთ In Whose Name?-ის ტრეილერი:
