ქართული ალტერნატიული სცენის ერთ-ერთი საინტერესო ბენდი Sexy Bicycle ახალი ვიდეოკლიპით დაბრუნდა. ჯგუფმა 30 აგვისტოს გამოაქვეყნა კლიპი კომპოზიციაზე When 6 is 9. სიმღერა პირველი სინგლია Sexy Bicycle-ის ცოტა ხნის წინ გამოცემული ალბომიდან COLOR CODE, რომელიც ათ კომპოზიციას აერთიანებს.
Sexy bicycle – ნიკა ელია:
„ეს არის ალბომ COLOR CODE-ის პირველი, გამხსნელი სიმღერა. ცოტა უცნაურია, იმიტომ რომ ჩვეულებრივ, არტისტები და მუსიკალური ბენდები ჯერ სინგლებს აქვეყნებენ და შემდეგ ალბომს, თუმცა ჩვენს შემთხვევაში პირიქით მოხდა. სამომავლოდ კიდევ ვაპირებთ, სხვა სინგლებზეც გადავიღოთ ვიდეოკლიპები. რაც შეეხება ამ ვიდეოს, იდეა ჩემია, ანიმაცია და მონტაჟიც მე გავაკეთე, დრონის კადრებით კი მეგობარი დაგვეხმარა.“
ვიდეოკლიპში ანიმაციური ფრაგმენტებისა და ვიდეოკადრების მონაცვლეობით ვიზუალური დინამიკა იქმნება, სადაც კომპოზიციის რიტმი ექსპრესიული გამოსახულებებით არის გადმოცემული. სიმღერა კლიპთან ერთად გამორჩეულ ატმოსფეროს ქმნის, რომელიც, თავის მხრივ, საინტერესო განწყობას აყალიბებს.
ნახეთ Sexy bicycle-ის ახალი ვიდეოკლიპი When 6 is 9.
