კამილა კაბელიომ ავსტრალიაში გამართულ კონცერტებზე გულშემატკივრები გააოცა, როცა ფორტეპიანოზე ნატალი იმბრულიას ჰიტის, Torn-ის ქავერი შეასრულა. ჰიტმა 1998 წელს ნატალი იმბრულიას წარმატება მოუტანა.
კამილა კაბელიომ ტურნე Yours, C Tour უკვე გამართა მელბურნში და სიდნეიში, შემდეგი კონერტი კი 14 სექტემბერს ბრაზილიაში, სან-პაულუში ჩატარდება. ავსტრალიაში გამართულ ორივე შოუზე კამილა კაბელიომ ფორტეპიანოსთან გულწრფელი ემოციებით გადმოსცა იმბრულიას სიმღერა, ვიდეო კი სოციალურ ქსელ X-ში გამოაქვეყნა.
„როცა ავსტრალიაში ხარ… აუცილებლად უნდა იმღერო Torn, მიყვარხარ, ნატალი იმბრულია. მიყვარხარ, ავსტრალია.“ – დაწერა კამილამ ვიდეოს აღწერაში.
ნატალი იმბრულიას სიმღერა Torn 1998 წელს ერთდროულად Billboard-ის სამი ჩარტის სათავეში მოექცა (Radio Songs, Pop Airplay და Adult Pop Airplay), ხოლო Hot 100-ში 42-ე ადგილი დაიკავა. იმავე წელს მომღერალი გრემიზე იყო ნომინირებული, საუკეთესო ქალის პოპ ვოკალური შესრულებისთვის, თუმცა იმ წელს დაუვიწყარი ჰიტით My Heart Will Go On – სელინ დიონმა გაიმარჯვა.
მიუხედავად იმისა, რომ პოპის მსმენელების უმეტესობას სწორედ ნატალი იმბრულიას ვერსია ახსენდებათ, სიმღერა Torn თავდაპირველად 1995 წელს ჯგუფმა Ednaswap გამოსცა.
ავსტრალიელმა მომღერალმა ნატალი იმბრულიამ კარიერის განმავლობაში ექვსი ალბომი გამოუშვა, მათ შორის უახლესი 2021 წელს გამოცემული Firebird-ია. გასულ წელს კი მოღერალი შოუში The Masked Singer Bluebell-ის ამპლუაში წარდგა.
ნახეთ, კამილა კაბელიოს მიერ Torn-ის ცოცხალი შესრულება.
when in australia… you have to sing torn 🇦🇺✨ ily natalie imbruglia & ily australia 💌 pic.twitter.com/mgdFcLAU7Z
— camila (@Camila_Cabello) August 31, 2025
