ტრადიციულად, წინანდლის ფესტივალის მე-7 სეზონი მრავალფეროვანი და გამორჩეული პროგრამით წარდგება აუდიტორიის წინაშე. 10 სექტემბერს, 12:00 საათზე, კამერული დარბაზის სცენა პაბლო ფერნანდესს (ჩელო) და ჟულიენ კანტანს (ფორტეპიანო) დაეთმობათ, სადაც მაქს ბრუხის „კოლ ნიდრეი“, ლუდვიგ ვან ბეთჰოვენის მესამე სონატა ჩელოსა და ფორტეპიანოსთვის და იოჰანეს ბრამსის პირველი სონატა გაჟღერდება.
თანამედროვე კლასიკური მუსიკის ახალგაზრდა ესპანელი ვარსკვლავი პაბლო ფერანდესი ერთ-ერთი ყველაზე მოთხოვნადი ჩელისტია. მისი შემოქმედება სიღრმისეული და შთამბეჭდავი შესრულებით გამოირჩევა. იგი ჩაიკოვსკის XV საერთაშორისო კონკურსის პრიზიორი, SONY Classical-ის ექსკლუზიური არტისტი და კრიტიკოსების მიერ „ჩელოს გენიოსად“ აღიარებული მუსიკოსია. პაბლო ფერანდესი რეგულარულად გამოდის მსოფლიოს უდიდეს ორკესტრებთან (Boston Symphony, Los Angeles Philharmonic, Royal Philharmonic და სხვა) და ხშირად არის მიწვეული ვერბიეს, ზალცბურგის, დრეზდენის და წინანდლის კლასიკური მუსიკის ფესტივალებზე.
ცნობილ ფრანგ მუსიკოსს, პიანისტ ჟულიენ კანტანს არაერთხელ მიუღია მონაწილეობა წინანდლის ფესტივალში. მისი რეპერტუარი მოიცავს როგორც კლასიკურ, ისე თანამედროვე კომპოზიციებს. კამერულ მუსიკაში კანტანს უთანამშრომლია ისეთ სახელოვან მუსიკოსებთან, როგორებიც არიან დევიდ გარეტი, გარი ჰოფმანი, ლიზა ბათიაშვილი, გოტიე კაპიუცონი, მარტინ ფროსტი, ემანუელ აქსი და სხვები. ჟულიენ კანტანს ჰქონია გამოსვლები მსოფლიოს უდიდეს საკონცერტო დარბაზებში: ლონდონის Wigmore Hall-ში, ამსტერდამის Concertgebouw-ში, ბერლინის ფილარმონიაში, ვენის Konzertaus-სა და ნიუ-იორკის Carnegie Hall-ში. აღსანიშნავია, რომ ჟულიენ კანტანი აქტიურად ქმნის ახალ მუსიკალურ პროექტებს, მათ შორის ექსპერიმენტულ ჟანრებში, კლასიკური და ელექტრონული მუსიკის შერწყმით.
ამავე საღამოს წინანდლის ამფითეატრში საერთაშორისო დონის კლასიკური მუსიკის ვარსკვლავები წარდგებიან: იტალიელი მაესტრო, დირიჟორი ჯანანდრეა ნოზედა, სოლისტი ნიკოლაი ლუგანსკი და პან-კავკასიური ორკესტრი. კონცერტზე ბეთჰოვენის და ბრამსის ნაწარმოებები შესრულდება.
გამოჩენილი დირიჟორი ჯანანდრეა ნოზედა მისი განსაკუთრებული ინტერპრეტაციით და შესრულების მანერით მსოფლიოში აღიარებული მუსიკოსია, რომელიც დინამიური სტილით სრულიად ახალ შტრიხებს სძენს კლასიკურ მუსიკას.
თანამედროვე კლასიკური სცენის ერთ-ერთი მნიშვნელოვანი ფიგურაა სოლისტი ნიკოლაი ლუგანსკი, რომლის ტექნიკური მახასიათებლები და მუსიკალური სიღრმე ერთგვარ პოეზიას ქმნის კლასიკურ მუსიკაში.
რაც შეეხება პან-კავკასიურ ახალგაზრდულ ორკესტრს, იგი ფესტივალის განუყოფელი ნაწილია, რომელიც უნიკალური კოლექტივითა და მაღალპროფესიული მუსიკოსებით არის დაკომპლექტებული. პან-კავკასიური ორკესტრი წინანდლის ფესტივალის ფარგლებში 2019 წელს შეიქმნა და ის კავკასიის რეგიონიდან შერჩეულ ნიჭიერ ახალგაზრდა მუსიკოსებს აერთიანებს. ორკესტრში მოსახვედრად ყოველწლიურად ცოცხალი მოსმენები ტარდება, მიმდინარე წელს კი კონკურსი ცხრა ქვეყანაში (საქართველო, უკრაინა, თურქეთი, სომხეთი, აზერბაიჯანი, მოლდოვა, ყაზახეთი, უზბეკეთი, თურქმენეთი.) გაიმართა.
წინანდლის ფესტივალის წარმდგენია კომპანია ,,სილქნეტი”.სრული პროგრამისა და ფესტივალის ბილეთების შესაძენად ეწვიეთ ბმულს.
