ქართული ალტერნატიული სცენის წარმომადგენელი ჯგუფი SKAZZ ახალ ალბომს გამოსცემს, რომლის სახელწოდებაცაა „მახე”. ალბომის ყდაზე Vice Versa-ს სააგენტომ იმუშავა.
„ახალ ალბომზე მუშაობის მთავარი ინსპირაცია ჩვენვე ვიყავით, საკუთარი ექსტრემალური გამოცდილებებით და მოულოდნელობებით სავსე ყოველდღიურობით, იმით, რაც შეიძლება, როგორც საშიში, ისე კარგი ყოფილიყო და არის ჩვენთვის. ალბომს „მახე” ჰქვია და თემატიკაც ამ სიტყვის ირგვლივ ტრიალებს, „მახე” რომელსაც ჩვენვე ვუგებთ ჩვენს თავებს ან ცხოვრება გვთავაზობს. აქ საუბარია სოციალურ, პოლიტიკურ, პირად გამოცდილებებზე.” – SKAZZ-ის ვოკალისტი საბა ვაშაყმაძე.
შემოქმედებითი პროცესის მრავალფეროვნება, ახალი წევრები და მომავალ ალბომზე მუშაობა ჯგუფისთვის საინტერესო გამოცდილება აღმოჩნდა.
„შემოქმედებითი პროცესი ორმაგად საინტერესო იყო წინა ალბომებთან შედარებით, რადგან ამ პროექტზე ჯგუფის ახალ წევრებთან ერთად ვმუშაობდით, დავით ქაჯაიასთან (დაფი), კოკო ანთელავასთან და ბოლოს თორნიკე ჭავჭანიძესთან ერთად, რომელიც SKAZZ-ის ახალი დრამერი და წევრია. ჯგუფში ყველას სხვადასხვა მუსიკალური გამოცდილება და ბექგრაუნდი გვაქვს, რაც უშუალოდ მუშაობის პროცესს თავისთავად საინტერესოს ხდიდა.” – საბა ვაშაყმაძე
ალბომში ერთ-ერთი განსაკუთრებული კომპოზიციაა „არა“, რომელიც ადამიანის შინაგან წინააღმდეგობაზეა. ეს სიმღერა არა მხოლოდ ალბომის, არამედ ჯგუფის ახალი ფაზის სიმბოლოდაც შეიძლება იყოს აღქმული.
„ალბომში პირადად ჩემთვის და, ვფიქრობ, ბიჭებისთვისაც გამორჩეული ტრეკია “არა”, სადაც მთავარი გმირი საუბრობს იმაზე, რომ მიუხედავად მისი დამაკმაყოფილებელი ცხოვრებისა, ის თავს ვერ აკავშირებს საკუთარ მესთან, მან იცის, რომ ნაწილია რაღაც მოძრაობის, რუტინის, რასაც ვერ გაურბის, ვერც ფულით. ცდილობს, დატოვოს კომფორტის ზონა და გაიგოს, ვინ არის სინამდვილეში და როგორია იმ წრის, გარემოს გარეთ, რომელშიც ცხოვრობს.” – ამბობს საბა ,,ბილბორდთან” საუბრისას.
რაც შეეხება SKAZZ-ის უახლოეს გეგმებს, 13 სექტემბერს ბენდი Monohall Batumi-ის სცენაზე Ad Black Sea 2025-ის ფარგლებში წარდგება. მათი მომდევნო პროექტი კი განსაკუთრებული იქნება, რადგან ის ბავშვებს ეხება.
„13 სექტემბერს ბათუმში Ad Black sea 2025-ზე დავუკრავთ, შემდეგი მიზანია, ჩავატაროთ კონცერტი ბავშვებისთვის. ეს იდეა დიდი ხანია, გვაქვს და გვინდა, პატარებმაც მოისმინონ მათთვის საყვარელი სიმღერები. ნოემბერში გერმანიაში მივემგზავრებით და დავუკრავთ ევროპაში ერთ-ერთ ყველაზე გამორჩეულ პანკ სცენაზე – Kopi-ში, ჯგუფ Tape Visitors-თან ერთად.” – ამბობს SKAZZ-ის ვოკალისტი საბა ვაშაყმაძე.
სულ მალე კი ბენდი ახალი ვიდეოს გამოცემას გეგმავს სიმღერისთვის „ტალღა”, რომელზეც ADHD Production-თან ითანამშრომლეს.
„ოთხ დღეში ჩვენი ახალი ვიდეო გამოვა სიმღერისთვის „ტალღა”. ახალი ალბომიდან, რომელზეც Adhd Production-თან ერთად ვიმუშავეთ. საოცარი გამოცდილება მივიღეთ, მსგავსი დონის პროფესიონალებთან პირველად ვითანამშრომლეთ და ვფიქრობთ, ყველას მოეწონება ეს სიმღერა. შემდეგი ვიდეო კი „არა”-ზე იქნება, რომელიც ასევე მალე იხილავს დღის შუქს.” – SKAZZ-ის ვოკალისტი საბა ვაშაყმაძე.
ახალი ალბომი „მახე” ერთგვარი მუსიკალური ექსპერიმენტია, სადაც წინააღმდეგობები ახალ შთაგონებად ტრანსფორმირდება.
მოისმინეთ SKAZZ-ის ალბომი „მახე”.
