ტეილორ სვიფტი თანამედროვე პოპის ერთ-ერთ მამას მიაგებს პატივს მომავალ სიმღერაში Father Figure, რომელიც, „ბილბორდის” ინფორმაციით, ჯორჯ მაიკლის ამავე სახელწოდების 1988 წლის ჰიტს ეძღვნება.
რამდენიმეკვირიანი ჭორების შემდეგ იმის შესახებ, რომ პოპვარსკვლავის ახალი ალბომის მეოთხე სიმღერაში გარდაცვლილი ლეგენდის ანაბეჭდი იქნებოდა, „ბილბორდი” ამ ინფორმაციას ადასტურებს. ნაცვლად ჯორჯ მაიკლის Father Figure-ის სემპლის გამოყენებისა, სვიფტი თავის ვერსიაში ამ ჰიტის ე.წ. ინტერპოლაციას გააკეთებს.
ახალი ამბავი ალბომის გამოსვლიდან სამი დღით ადრე გავრცელდა. The Life of a Showgirl-ის გამოცემა 3 ოქტომბერსაა დაანონსებული. ამ კვირაში სვიფტის ფანები სოციალურ მედიაში ბევრს წერდნენ, რომ შესაძლოა სწორედ მაიკლი ყოფილიყო მითითებული Father Figure-ის ავტორად, თუმცა ეს ინფორმაცია აქამდე არ დასტურდებოდა.
ჯორჯ მაიკლის ყოფილმა პარტნიორმა კენი გოსმა აგვისტოში TMZ-ს უთხრა, რომ მან იცოდა შესაძლო ინტერპოლაციის შესახებ და ფიქრობდა, რომ მაიკლს გაუხარდებოდა, თუ სვიფტი Father Figure-ს თავის მუსიკაში გამოიყენებდა.
Father Figure ერთ-ერთია იმ რამდენიმე დიდი ჰიტიდან, რომელიც მაიკლის 1987 წლის სადებიუტო ალბომ Faith-ში შევიდა. 1988 წელს სიმღერამ ორი კვირა გაატარა Billboard Hot 100-ში. გასულ წელს კი კვლავ ამოტივტივდა „ტიკტოკზე” მოპოვებული პოპულარობის წყალობით.
სვიფტის სიმღერა, რომელიც ჯორჯ მაიკლის ნამუშევარს მოიცავს, თითქმის ორი დეკადის შემდეგ გამოდის, რაც მან პირველად მიაგო პატივი გარდაცვლილ ვარსკვლავს. 2008 წელს ტეილორმა თავის საშობაო ალბომში Last Christmas-ის ქავერი ჩაწერა.
თუ არ ჩავთვლით Father Figure-ს, სვიფტის ახალ ალბომში The Life of a Showgirl ერთადერთი მოწვეული სტუმარი საბრინა კარპენტერი იქნება.
