Megan Thee Stallion-მა გულშემატკივარს სოციალურ ქსელში ახალი სიმღერის მცირე მონაკვეთი გაუზიარა. „გაიღვიძეთ #kissinyou,” – დაწერა მომღერალმა, რითაც, სავარაუდოდ, ახალი სიმღერის სახელწოდება (Kissin You) გაამხილა.
სინგლი მოიცავს Total-ის 1996 წლის სადებიუტო ალბომში შესული სიმღერის, Kissin’ You-ს სემპლის ლუპს. აღნიშნული კომპოზიციის სემპლით შექმნილი ერთ-ერთი ვერსია ბოლო დროს ვირუსულად გავრცელდა „ტიკტოკზე”. მეგანის ფანები კი მომღერალს მისეული ვერსიის შექმნას სთხოვდნენ. Megan Thee Stallion-მა თხოვნა შეასრულა, თუმცა სინგლის გამოცემის თარიღი ჯერჯერობით არ დასახელებულა.
25-წამიან ვიდეოში კამუფლაჟის შარვალში, ყავისფერ ჩექმებსა და შალის ქუდში გამოწყობილი მეგანი ახალი სიმღერის ფონზე სტუდიაში ცეკვავს.
ცხადია, რომ სინგლი, მომღერლის პარტნიორსა და NBA-ის ვარსკვლავ კლეი თომპსონს ეძღვნება. წყვილი პირველად საჯაროდ ივლისში Pete & Thomas Foundation Gala-ს წითელ ხალიჩაზე გამოჩნდა.
„არავის შევხვედრივარ ასეთ კეთილს. ეს ჩემი პირველი ურთიერთობაა, როცა ისეთ ადამიანთან ვარ, რომელიც ნამდვილად კარგი პიროვნებაა და ნამდვილად ბედნიერს მხდის,” – ამბობდა მუსიკოსი.
ფანები ასევე აღტაცებული დარჩნენ სტუდიაში კალათბურთელის გამოჩენით, რის გამოც იმედოვნებენ, რომ ჰორიზონტზე მეგანის ახალი ერა მოჩანს.
წლევანდელი წელი Megan Thee Stallion-ისთვის კარიერული თვალსაზრისით საკმაოდ მშვიდი იყო. მისი ერთადერთი მუსიკალური აქტივობა აპრილში გამოცემული სინგლი Whenever იყო.
