მას შემდეგ, რაც ცნობილი გახდა, რომ Bad Bunny 2026 წლის Super Bowl-ის მუსიკალური შოუს მთავარ შემსრულებლად შეირჩა, კონსერვატიულმა ორგანიზაციამ – Turning Point USA გამოაცხადა, რომ თამაშის ტაიმებს შორის ალტერნატიული შოუს გამართვას გეგმავს, სადაც მუსიკა „ინგლისურ ენაზე გაჟღერდება“.
ორგანიზაციამ, რომელიც გარდაცვლილმა აქტივისტმა, ჩარლი კირკმა დააფუძნა, ეს ინიციატივა 9 ოქტომბერს სოციალურ ქსელ X-ზე გამოქვეყნებული პოსტით გაასაჯაროვა:
„Turning Point USA სიხარულით იუწყება ‘The All American Halftime Show’-ს შესახებ,“ – წერია პოსტში.
პოსტის თანდართული ბანერის მიხედვით, პროგრამა მიეძღვნება „რწმენას, ოჯახსა და თავისუფლებას“. ორგანიზაცია ასევე აღნიშნავს, რომ შოუს მონაწილეები „მალე გამოცხადდებიან“, თუმცა, როგორც ჩანს, ამ ეტაპზე არც ერთი არტისტი არ ჰყავთ შერჩეული.
შოუს ოფიციალურ ვებგვერდზე განთავსებულია გამოკითხვა, სადაც მომხმარებლებს შეუძლიათ აირჩიონ, რა ჟანრის მუსიკის მოსმენა სურთ 2026 წლის 8 თებერვალს – ქანთრი, პოპი, „worship”, ამერიკანა, კლასიკური, თუ „რაიმე ინგლისურ ენაზე“.
Billboard-მა კომენტარისთვის Bad Bunny-ს წარმომადგენელს მიმართა.
ფრაზა „anything in English“ („რამე ინგლისურ ენაზე”) პირდაპირ მიუთითებს იმ უკმაყოფილებაზე, რომელიც ბევრმა რესპუბლიკელმა გამოხატა Jay-Z-ის და Roc Nation-ის გადაწყვეტილების მიმართ. ბევრი მათგანი აღშფოთებულია იმით, რომ მთავარი შემსრულებელი იქნება ადამიანი, რომლის მუსიკაც ძირითადად ესპანურ ენაზეა. თეთრი სახლის ყოფილი მრჩეველი კორი ლუანდოვსკი კი აცხადებს, რომ „სირცხვილია [ჰედლაინერად] იმ ადამიანის შერჩევა, რომელსაც, როგორც ჩანს, ასე ძალიან სძულს ამერიკა.“
მიმდინარე მოვლენებს თავად დონალდ ტრამპიც გამოეხმაურა, როცა თქვა, რომ Bad Bunny „სასაცილო არჩევანია“. „არასდროს მსმენია მის შესახებ. არ ვიცი, ვინ არის. არ ვიცი, რატომ აკეთებენ ამას. ეს სიგიჟეა,“ – განაცხადა ტრამპმა.
დაუზუსტებელია, საიდან გაჩნდა წარმოდგენა, რომ Bad Bunny თითქოს ამერიკის წინააღმდეგ არის განწყობილი. მუსიკოსი პუერტო-რიკოდანაა. ეს არის ტერიტორია, რომელზეც თავად აშშ-ის იურისდიქცია ვრცელდება. მართალია, არტისტმა გადაწყვიტა, მომავალი ტურნეს დროს კონცერტები აშშ-ში არ გაემართა, თუმცა თავადვე განმარტა, რომ ეს „არ იყო სიძულვილით განპირობებული“. „არსებობს ბევრი მიზეზი, რატომაც არ გადავინაცვლებ აშშ-ში. მიზეზები არ უკავშირდება სიძულვილს – ძალიან ბევრჯერ გამოვსულვარ შეერთებულ შტატებში და ყველა შოუ წარმატებული იყო, ყველა ძალიან გაერთო. მიყვარს იქ მცხოვრებ ლათინო-ამერიკელებთან კონტაქტი. ლათინო-ამერიკელები და აშშ-ში მცხოვრები პუერტო-რიკოელები თავისუფლად შეძლებდნენ შოუს სანახავად მოსვლას, მაგრამ პრობლემა ის არის, რომ შოუს გარეთ, შესაძლოა, ICE (სახელმწიფო მიგრაციის სამსახური) ყოფილიყო, რაც ფანებისთვის პრობლემურ სიტუაციას შექმნიდა. სწორედ ეს საკითხი გვაწუხებს,” – თქვა მუსიკოსმა.
როგორც Billboard-ის ლათინო-ესპანურენოვანი მიმართულების ხელმძღვანელი, ლეილა კაბო აღნიშნავს, Bad Bunny-ის შერჩევაში არაფერია არსებითად პოლიტიკური: „ჩვენ, ვინც ყოველდღე ვსაუბრობთ ესპანურად, კარგად ვიცით, რომ ბევრი ადამიანი ჯერ კიდევ უპატივცემულობას ავლენს ამ ენის და იმ ხალხის მიმართ, ვინც ესპანურად საუბრობს. უნდა ვაღიაროთ, რომ Bad Bunny-ს Super Bowl-ის ჰედლაინერად დანიშვნა გამბედავი არჩევანია, მაგრამ გულწრფელად უნდა ვისაუბროთ მიზეზებზე,“ – წერს ის თავის ბოლო სტატიაში.
