ოსკაროსანი მსახიობი დაიან კიტონი კალიფორნიაში 79 წლის ასაკში გარდაიცვალა, ინფორმაციას ამის შესახებ ჟურნალი PEOPLE ადასტურებს, თუმცა ამ ეტაპზე დამატებითი დეტალები უცნობია.
დაიან კიტონის კინოდებიუტი 1970 წელს ფილმ Lovers and Other Strangers-ში შედგა, თუმცა ფართო აღიარება ფრენსის ფორდ კოპოლას ფილმით The Godfather მოიპოვა, სადაც მას პარტნიორობას ალ პაჩინო უწევდა.
1977 წელს დაიან კიტონმა ვუდი ალენის ფილმში, Annie Hall-ში შესრულებული როლისთვის საუკეთესო ქალი მსახიობის ნომინაციაში ოსკარი მიიღო. აღსანიშნავია, რომ ვუდი ალენმა Annie Hall-ის როლი სწორედ დაიან კიტონისთვის შექმნა. მსახიობს არაერთი როლი აქვს შესრულებული ვუდი ალენის ფილმებში, მათ შორის: Sleeper, Love and Death, Interiors, Play It Again, Sam და Manhattan. უნდა ითქვას, რომ იმ პერიოდში დაიან კიტონი რეჟისორის მუზა გახლდათ.
მსახიობის ხანგრძლივი კარიერა მოიცავს ისეთ ფილმებს, როგორებიცაა: Looking for Mr. Goodbar (1977), Reds (1981), Shoot the Moon (1982) და The Little Drummer Girl (1984). რეჟისორ ნენსი მაიერსთან მან პირველად 1987 წელს, ფილმ Baby Boom-ში მონაწილეობისას ითანამშრომლა, მოგვიანებით კი მათ კიდევ სამ ფილმზე იმუშავეს ერთად: Father of the Bride (1991), Father of the Bride Part II (1995) და Something’s Gotta Give (2003), რომლისთვისაც კიტონმა კიდევ ერთი ოსკარის ნომინაცია მიიღო.
