ბრიუს სპრინგსტინი იმ დროში გვაბრუნებს, როცა E.T. კინოთეატრებში ლიდერობდა, მაიკლ ჯექსონის Thriller მსოფლიოს იპყრობდა, ხოლო თეთრ სახლში რონალდ რეიგანი ცხოვრობდა.
შუაღამისას ბრიუს სპრინგსტინმა მოულოდნელად გააზიარა ახალი რელიზი – Nebraska ’82: Expanded Edition. მუსიკოსმა ჩანაწერი Sony Music-ის ლეიბლით გამოსცა. ალბომი აქამდე უცნობ მასალებს მოიცავს, რაც არტისტის ფანების ახდენილი ოცნებაა.
ალბომი ხელმისაწვდომია როგორც ციფრული, ისე ხუთდისკიანი ბოქს-სეტის სახით. მასში თავმოყრილია სოლო ჩანაწერების იშვიათი ვერსიები, ლეგენდარული „Electric Nebraska“-ს სესიების ჩანაწერები, Nebraska-ს სრულად შესრულება, რომელიც 1982 წლის აპრილში ჩაიწერა, ასევე ცოტა ხნის წინ გამოქვეყნებული ვერსია Born in the U.S.A.-ის, სადაც სპრინგსტინს შემოქმედებით პარტნიორობას უწევენ მაქს ვაინბერგი და გარი ტალენტო. რაც მთავარია, ამ რელიზში შესულია Nebraska-ს განახლებული ვერსია, 2025 წელს გაკეთებული მასტერინგით.
„კლავიშები საერთოდ ამოვიღეთ და ფაქტობრივად ტრიოდ დავრჩით,“ – იხსენებს სპრინგსტინი Born in the U.S.A.-ს ვერსიაზე საუბრისას. „ვეცადეთ, Nebraska-სთვის ელექტრონული სიცოცხლე მიგვეცა.“
ალბომის გამოცემა ერთი კვირით გადაიდო, რადგან ფილმის – Springsteen: Deliver Me from Nowhere-ის პრემიერას დაემთხვა. სკოტ კუპერის რეჟისურითა და 20th Century Studios-ის წარმოებით გადაღებული ბიოგრაფიული ფილმი აღწერს Nebraska-ს შექმნის ისტორიას.
ჩვენების შემდეგ სპრინგსტინი თავად გამოჩნდა სცენაზე. მან სტუმრებს მადლობა გადაუხადა ფილმის მხარდაჭერისთვის და ხუმრობით დაამატა: „ესაა ჩემი ბოლო ღამე კინოში – მუსიკას დავუბრუნდები.“
სიტყვით გამოსვლისას მუსიკოსმა კიდევ ერთხელ მიმართა აუდიტორიას და დონალდ ტრამპის წინააღმდეგ საკუთარი პოზიცია დააფიქსირა. „უკვე 50 წელია, ამერიკის ერთგვარი მუსიკალური ელჩივით დავდივარ და საკუთარი თვალით მინახავს, რამდენად უყვარს მსოფლიოს ის ამერიკა, რომელიც საკუთარ უმაღლეს იდეალებს ეყრდნობა. მიუხედავად იმისა, რა ზიანი მიადგა ქვეყანას ბოლო წლებში, იმ იდეალებისთვის მაინც ღირს ბრძოლა.” – ამის შემდეგ ბრიუს სპრინგსტინმა Land of Hope and Dreams შეასრულა.
რაც შეეხება ფილმს – Deliver Me From Nowhere – სპრინგსტინის როლს ჯერემი ალენ უაიტი ასრულებს.
