წლევანდელი „თბილისი ბაროკოს ფესტივალის” პროგრამა 10 გამორჩეულ კონცერტს მოიცავს. ქართული მუსიკალური სცენის წარმომადგენლებთან ერთად ფესტივალში მსოფლიოში აღიარებული ბაროკოს შემსრულებლები მიიღებენ მონაწილეობას:
ანდრეას შოლი (კონტრტენორი / გერმანია), ჯულია ბოლკატო (სოპრანო / იტალია), კორნელია ფონ კერსენბროკი (დირიჟორი/გერმანია), „ჰელსინკის ბაროკოს ორკესტრი“, ააპო ჰეკინენი (კლავესინი / ფინეთი), ლეილა შაიეგი (ვიოლინო / შვეიცარია), ვალენტინ ტურნე (ვიოლა და გამბა / საფრანგეთი), კრისტინე ბუში (ვიოლინო / გერმანია), დოროთე მილდსი (სოპრანო / გერმანია), ფრანჩესკო ჩერა (კლავესინი, ორგანი, დირიჟორი / იტალია), დიეგო კანტალუპი (თეორბო, ბაროკოს გიტარა / იტალია), ფოლკლორული ანსამბლი „შავნაბადა“ და „თბილისის ქალთა გუნდი“.
ტრადიციულად, „თბილისის ბაროკო ფესტივალის“ პროგრამა მრავალფეროვანი და შთამბეჭდავია. სოლო, საორკესტრო, ვოკალური და საგუნდო კომპოზიციები აუდიტორიას ბაროკოს მუსიკის უნიკალურ სივრცეში ამოგზაურებს.
აღსანიშნავია, რომ ფესტივალს წელს ახალი ელემენტიც შეემატა: სამეცნიერო კონფერენცია – „მუსიკა ბაროკომდე და ბაროკოს ეპოქაში“, რომელიც „საქართველოს სინფონიეტასა“ და კონსერვატორიის ერთობლივი ორგანიზებით 4 დეკემბერს, თბილისის სახელმწიფო კონსერვატორიაში გაიმართება.
ფესტივალი 28 ოქტომბერს, ჯანსუღ კახიძის სახელობის თბილისის მუსიკალურ-კულტურულ ცენტრში გაიხსნება კონცერტით – „ქართული და ევროპული ძველი მუსიკა“. პირველ განყოფილებაში „შავნაბადა“ ქართული ტრადიციული მუსიკის უძველეს ნიმუშებს შეასრულებს, ხოლო მეორე განყოფილებაში ანდრეას შოლი, ცნობილი იტალიელი სოპრანო ჯულია ბოლკატო, „თბილისის ქალთა გუნდი“ და „საქართველოს სინფონიეტა“, კორნელია ფონ კერსენბროკის დირიჟორობით ჯოვანი ბატისტა პერგოლეზის შედევრს – Stabat Mater-ს შეასრულებენ.
ნოემბერში ფესტივალი რუსთაველის ეროვნული თეატრის მცირე სცენაზე გაგრძელდება, კონცერტები 9, 12, 18, 24, 27, 30 ნოემბერს და 2 დეკემბერს ჩატარდება, დასკვნითი საღამო კი 7 დეკემბერს თბილისის სახელმწიფო კონსერვატორიის დიდ დარბაზში გაიმართება.
ფესტივალის სრული პროგრამისა და ბილეთების შესაძენად ეწვიეთ ბმულს.
