10 წლის წინ მაკ მილერმა დიდ ლეიბლზე გამოსცა თავისი პირველი ალბომი – GO:OD AM, რომელიც შეფასდა, როგორც გულწრფელი და მელოდიური ნამუშევარი დამოკიდებულებაზე, განკურნებასა და ცნობადობაზე. ალბომი Billboard 200-ის ჩარტში მე-4 ადგილზე მოხვდა. ახლახან მაკ მილერის მემკვიდრეობის სახელით მოქმედმა გუნდმა ალბომის იუბილეს აღსანიშნავად სამი ახალი სიმღერა გამოაქვეყნა.
მილერის საავტორო უფლებების წარმომადგენლებმა ითანამშრომლეს არტისტ დანაე გოსესთან, რომელმაც ვიზუალიზაციების სერია შექმნა. მათ შორის არის ვიზუალური ნამუშევარი ტრეკისთვის – Rush Hour, რომელიც ალბომის თავდაპირველი ვერსიის ნაკლებად ცნობილი სიმღერაა. გოსე მრავალი წელია, მილერის პროექტებზე მუშაობს. ის მონაწილეობდა როგორც Balloonerism-ის ვიზუალური კონცეფციის შექმნაში, ასევე იმუშავა კლიპზე – Star Room (OG Version), რომელიც ალბომის – Watching Movies with the Sound Off-ის ათი წლის იუბილეს აღსანიშნავად გამოქვეყნდა.
GO:OD AM (10th Anniversary) არის ამ დროისთვის ბოლო პროექტი იმ აქტივობების სერიაში, რომლითაც მილერის მემკვიდრეობის წარმომადგენელი გუნდი რეპერის მესამე სტუდიური ალბომის იუბილეს აღნიშნავს. გასულ თვეში, 18 სექტემბერს გამოქვეყნდა 15-წუთიანი დოკუმენტური ფილმი სემ ბალაბანის რეჟისორობით. ფილმი ალბომის შექმნის პროცესს აღწერს. ნამუშევარს, რომელიც ხელმისაწვდომია YouTube-ზე, უკვე 320 000-ზე მეტი ნახვა აქვს.
2025 წლის დასაწყისში, 15 იანვარს, ასევე გამოიცა მილერის გარდაცვალების შემდგომი მეორე ალბომი – Balloonerism, რომელიც არტისტმა დაახლოებით 2014 წელს ჩაწერა. ჩანაწერი მოიცავს კოლაბორაციებს SZA-სთან და მილერის ალტერ ეგოსთან – Delusional Thomas-თან. ალბომმა Billboard 200-ის ჩარტში მე-3 ადგილი დაიკავა. ის მილერის მეშვიდე სტუდიური ალბომი გახდა, რომელიც ჩარტის ტოპ ხუთეულში შევიდა. ამავე სახელწოდების ანიმაციურმა ფილმმა, რომელიც ხელმისაწვდომია Apple TV+-ზე, 2025 წლის MTV Video Music Awards-ზე ნომინაციაც მოიპოვა.
