Tindra – მულტიინსტრუმენტალისტი არტისტის, სოფიკო გვიმრაძის სასცენო სახელია, რომელიც სხვადასხვა სახელოვნებო დარგში მოღვაწეობს. არტისტმა ცოტა ხნის წინ ტრეკი „საჭე” და მასზე შექმნილი ვიდეო გამოაქვეყნა, რომლის მუსიკა, ტექსტი და არანჟირებაც ავტორის შექმნილია.
Tindra – სოფიკო გვიმრაძე:
„ეს ტრეკი “დიაცის” კომპილაციურ ალბომში დარელიზდა. „საჭე“ ჩემი ერთ-ერთი პირველი ტრეკია, რომელიც წელიწადნახევრის წინ დავასრულე. მე ვარ მუსიკის, არანჟირების და ლექსის ავტორი. თუმცა სულ სხვა ვიდეო მქონდა წარმოდგენილი, რომელმაც გარკვეული მიზეზების გამო დღის შუქი ვერ ნახა.
კლიპში გამოყენებული კადრები, სხვა ტრეკისთვის გვქონდა გათვლილი (ვიდეოს ავტორია @neonratio დენოლა გუგავა.) თუმცა ჩემმა მეგობარმა, გიორგი ნაზღაიძემ @mm.elekrtik ამ კადრების ნახვისას მთხოვა, ამ სიმღერაზე აგვეწყო ვიდეო და ასე, ერთ საათში დაიბადა ეს ნამუშევარი.“
არტისტის თქმით, სიმღერასთან ერთად, ვიზუალიც იმ ემოციური გზავნილის გახმოვანებაა, რომელიც გაუჩინარების სურვილისა და პესიმიზმის მიუხედავად, წინსვლისა და გზის გაგრძელების მცდელობას გულისხმობს.
„ამ ლექსსა და მუსიკაში ჩემი დაკომკიდებულებაა ასახული, რომელიც დამალვის სურვილთან, ფარ-ხმალის დაყრასთან, მაგრამ შემდეგ ისევ გზის გაგრძელების პროცესთან ასოცირდება და ასე გამოვიდა ვიდეოშიც.” – ამბობს Tindra.
ტრეკი „საჭე“ შემოქმედებითი და ყოფითი გზის ერთგვარი მეტაფორაა, რომელიც შინაგან ბრძოლასთან ერთად განმეორებითი საწყისის თემებს ეხმიანება და იმავდროულად თვითშემეცნების პროცესსაც ასახავს.
მოისმინეთ Tindra-ს ტრეკი „საჭე”
