A$AP Rocky-ს ფანები დიდი ხანია, მის ახალ ალბომს ელიან. ეს კარგად იცის თავად არტისტმაც და ახლახან ამ საყოველთაო მოლოდინს იუმორით გამოეხმაურა. რეპერმა ხუმრობით თქვა, რომ პროექტი, შესაძლოა, არასდროს გამოვიდეს.
ინსტაგრამის პოპულარულ გვერდთან – The People Gallery-სთან საუბრისას როკის ალბომზე დაუსვეს კითხვა. „Don’t Be Dumb არასდროს გამოვა,” – თქვა არტისტმა სიცილით.
A$AP Rocky-მ მოდის ინდუსტრიის ცნობილ დაჯილდოებაზე, CFDA Fashion Awards-ზე ე.წ. Fashion Icon-ის ჯილდო მიიღო. წითელ ხალიჩაზე მუსიკოსმა ისაუბრა იმის შესახებ, თუ როგორია ქალიშვილის მამობა და მშობლის სტატუსი რიანასთან ერთად.
„იცით რა, გოგონას მამობა შესანიშნავია,“ – უთხრა მან გამოცემა Extra-ს.
A$AP Rocky-მ ბოლო ალბომი Testing შვიდი წლის წინ გამოუშვა. მიუხედავად ახალი ალბომის გამოცემის დაგვიანებისა, 2025 წელი რეპერისთვის კარიერულად აქტიური იყო. თებერვალში ის სასამართლომ გაამართლა ცეცხლსასროლი იარაღიდან სროლის საქმეში, რომელშიც დაზარალებულის სტატუსი მის ყოფილ შემოქმედებით პარტნიორს, A$AP Relli-ს ჰქონდა. A$AP Rocky-მ ასევე ითამაშა მთავარი როლი სპაიკ ლის ფილმში Highest 2 Lowest. კინოსურათში არტისტს პარტნიორობას დენზელ ვაშინგტონი უწევს.
„მთავარი არ არის, ვინ იყო პირველი, მთავარია ვინ აკეთებს ამას საუკეთესოდ,“ – თქვა Rocky-მ. „ყველაფერი, რასაც ვაკეთებ, მემკვიდრეობის შენებაზეა დაფუძნებული, ამიტომ არ ვჩქარობ. მე ამას არ ვაკეთებ მხოლოდ იმისთვის, რომ აქტუალური ვიყო ან ჩემი სახელი ისმოდეს. ვცდილობ, ვაკეთო შემოქმედებითი, ამბიციური რამ,” – აღნიშნა A$AP Rocky-მ.
