Snoop Dogg-ს თავისი საყვარელი საფეხბურთო კლუბის, გლაზგოს „სელტიკის” მფლობელთა შორის ყოფნა სურს.
შოტლანდიის Daily Record-თან საუბრისას, სნუპმა, რომელმაც წლის დასაწყისში ინგლისის ჩემპიონატის გუნდ „სვონსი სიტიში” ინვესტიცია განახორციელა, განაცხადა, რომ ახლა მზადაა, იგივე „სელტიკთანაც” გააკეთოს.
„ეს ისაა, რაზეც წარსულშიც მისაუბრია და თუ შესაძლებლობა მომეცა, აუცილებლად გავაკეთებ. „სელტიკი” დიდი კლუბია და ფანებს ამ დიდებულ სტადიონზე საუკეთესო ფეხბურთელების ნახვა სურთ. ერთადერთი, რაც მისმა მფლობელებმა უნდა გააკეთონ, უბრალოდ უნდა მკითხონ,” – ამბობს რეპერი.
შოტლანდიის პრემიერლიგაში მოასპარეზე „სელტიკი” The Old Firm-ის ერთ მხარეს წარმოადგენს – მოვლენის, რომელიც ეწოდება ისტორიულ დერბის მატჩებს „სელტიკსა” და ასევე გლაზგოს საფეხბურთო კლუბ „რეინჯერს” შორის. „სელტიკ პარკი” კი, კლუბის საკულტო საშინაო სტადიონი, მართლაც უზარმაზარია და ის 60 000 მაყურებელს იტევს. გუნდს 100 მთავარი ტიტული აქვს მოპოვებული, მათ შორისაა ევროპის თასი (ამჟამად უეფას ჩემპიონთა ლიგა) 1966-1967 საფეხბურთო სეზონზე.
სნუპი არ არის ფეხბურთის რიგითი გულშემატკივარი. Record-თან საუბრისას მან „სელტიკის” შანსებიც განიხილა, რომელსაც ამჟამად მარტინ ო’ნილი ხელმძღვანელობს, ბრენდან როჯერსის კლუბიდან წასვლის შემდეგ. რეპერის თქმით, მომავალი წარსულს ეკუთვნის და ის ისურვებდა კლუბში ავსტრალიელი მწვრთნელის, ანჯ პოსტეკოგლუს დაბრუნებას, რომელიც, „ნოტინგემ ფორესტის” მცირეხნიანი ხელმძღვანელობის შემდეგ, ამჟამად თავისუფალია.
„სელტიკთან” 2-წლიანი წარმატებული სამწვრთნელო პერიოდის დროს პოსტეკოგლუმ კლუბს მრავალი ტიტული მოაგებინა. „მარტინ ო’ნილი დიდ პატივისცემას იმსახურებს. ის მუდამ ჩვენთანაა, როცა გვჭირდება. თუმცა ვფიქრობ, რომ ანჯი უნდა დავაბრუნოთ. კლუბი იმას გააკეთებს, რაც უნდა გააკეთოს, მაგრამ ფანებს ნამდვილად გაუხარდებათ მისი დაბრუნება.”
როგორც აღმოჩნდა, სნუპი სპორტის დიდი გულშემატკივარია. 2005 წელს მან სნუპის ახალგაზრდული საფეხბურთო ლიგა (SYFL) დააარსა, რომელმაც ეროვნული საფეხბურთო ლიგის (NFL) არაერთი მოთამაშე გაზარდა. გასულ თვეს კი რეპერმა ავსტრალიის საფეხბურთო ლიგის ფინალზე იმღერა.
