2025 წლის ერთ-ერთ ყველაზე პრესტიჟულ საბავშვო მუსიკალურ კონკურსს წელს თბილისი უმასპინძლებს, სადაც საქართველოს სახელით პირველი არხის მუსიკალური პროექტის, „რანინას” მერვე სეზონის გამარჯვებული, 11 წლის ანიტა აბგარიანი წარდგება.
7 ნოემბერს საქართველომ ანიტა აბგარიანის საკონკურსო სიმღერა Shine Like a Star და მასზე გადაღებული ვიდეოკლიპი გამოაქვეყნა. მუსიკის ავტორი კომპოზიტორი გიგა კუხიანიძეა, ტექსტი მარიამ ღვალაძეს ეკუთვნის, ვიდეორგოლზე კი პირველი არხის თანამშრომლებმა იმუშავეს. კლიპის რეჟისორი თემურ კვირკველიაა, კოსტიუმის დიზაინი კი იზა ნადარეიშვილმა შექმნა.
საქართველო უკვე მეორედ მასპინძლობს საერთაშორისო მუსიკალურ საბავშო კონკურსს, რომელიც 13 დეკემბერს თბილისის ოლიმპიურ სასახლეში გაიმართება.
აღსანიშნავია, რომ საქართველო საბავშვო ევროვიზიის ისტორიაში ერთ-ერთი ყველაზე წარმატებული ქვეყანაა, რომელსაც კონკურსი ოთხჯერ აქვს მოგებული. პირველად საბავშო ევროვიზია საქართველოში 2017 წელს გაიმართა, გასულ წელს კი ესპანეთის დედაქალაქ მადრიდში გამართულ კონკურსზე 11 წლის ანდრია ფუტკარაძემ მოიპოვა გამარჯვება, რის შედეგადაც თბილისი უკვე მეორედ საბავშვო ევროვიზიის მასპინძელი ქალაქი გახდა.
წლევანდელ კონკურსში 18 ქვეყანა მიიღებს მონაწილეობას.
ნახეთ საბავშვო ევროვიზიის მონაწილის, ანიტა აბგარიანის საკონკურსო სიმღერა Shine Like a Star.
