„ეშმაკს აცვია პრადა” ოფიციალურად დაბრუნდა. 12 ნოემბერს ფილმის პირველი ტრეილერი გამოქვეყნდა, რომლის საუნდტრეკიც მადონას ცნობილი სიმღერაა.
50-წამიან ვიდეოში მაყურებელი ბრუნდება ჟურნალ Runway-ს ოფისში, ნიუ-იორკში, სადაც მირანდა პრისლი წითელი ქუსლიანი ფეხსაცმლით მიაბიჯებს. კადრებს ფონად გასდევს მადონას საკულტო სიმღერა Vogue, რომელიც Billboard Hot 100-ის ლიდერი ჰიტია.
მას შემდეგ, რაც მერილ სტრიპი ლიფტში შედის, კარის დახურვამდე მას ენ ჰეთეუეი უერთდება, რომელიც ენდი საქსის როლს განასახიერებს. „მირანდა,” – ამბობს ჰეთეუეის პერსონაჟი. სტრიპის გმირი კი პასუხობს: „საკმაოდ დიდი დრო დაგჭირდა.”
ფილმის პრემიერა 2026 წლის მაისშია დაგეგმილი. ცნობილია, რომ მასში ასევე ბრუნდებიან სტენლი ტუჩი და ემილი ბლანტი.
მადონასთვის უცხო არ არის „ეშმაკს აცვია პრადას” სამყარო. Vogue გამოყენებულია ფილმის პირველი ნაწილის ერთ-ერთ სცენაშიც, სადაც ენდი ნიუ-იორკის ქუჩებში მაღალი მოდის ტანისამოსს ირგებს და საბოლოოდ მირანდას აღიარებას იმსახურებს.
მართალია, ფილმის ბევრი დეტალი ჯერ კიდევ უცნობია, თუმცა, როგორც ცნობილია, „ეშმაკს აცვია პრადა 2” წარმოაჩენს, თუ როგორ უმკლავდება Runway-ს სტაჟიანი რედაქტორი მირანდა პრისლი ბეჭდური ინდუსტრიის კრიზისს. ფილმში ძველ პერსონაჟებთან ერთად ახალი სახეებიც გამოჩნდებიან, რომელთა შორის, გავრცელებული ინფორმაციით, ლედი გაგაც არის.
ნახეთ ტრეილერი:
