ემინემმა და მისმა მენეჯერმა, პოლ როზენბერგმა, ამერიკული ფეხბურთის ცნობილ გუნდთან – Detroit Lions-თან მრავალწლიან პარტნიორობას მოაწერეს ხელი, რომლის მიხედვითაც, ისინი მადლიერების დღის მუსიკალური შოუს აღმასრულებელი პროდიუსერები იქნებიან.
Lions-მა 13 ნოემბერს განაცხადა, რომ ემინემი და როზენბერგი 2025 წლიდან 2027 წლამდე შოუს წარმოების, პრეზენტაციისა და შემსრულებელთა შერჩევის პროცესში კონსულტანტების სტატუსით ჩაერთვებიან.
„ჩვენთვის დიდი პატივია Lions-თან ძალების გაერთიანება და დეტროიტის სპორტის უდიდეს ტრადიციაში მონაწილეობის მიღება,“ – თქვა როზენბერგმა განცხადებაში. „ათეულობით მილიონ მაყურებელს შევთავაზებთ დაუვიწყარ შოუებს, სადაც მსოფლიო დონის არტისტები გამოვლენ.“
მუსიკალურ შოუზე პროდიუსერული კომპანია Jesse Collins Entertainment იმუშავებს. ბოლო წლებში მუსიკალური შოუების მთავარი შემსრულებლები იყვნენ Shaboozey, ჯეკ ჰარლოუ და Big Sean.
„ძალიან გვიხარია, რომ ვმუშაობთ მარშალთან და პოლთან – მუსიკალურ ინდუსტრიაში ორ ყველაზე წარმატებულ და ავტორიტეტულ ფიგურასთან, თანაც ისინი მრავალი წელია, Lions-ის გულშემატკივრები არიან,“ – აღნიშნა Detroit Lions-ის პრეზიდენტმა და აღმასრულებელმა დირექტორმა, როდ ვუდმა. „მათი რეპუტაცია მოგვცემს შესაძლებლობას, მოვიზიდოთ უმაღლესი დონის არტისტები და საბოლოოდ, ეს ყოველწლიური შოუ ერთ-ერთ ყველაზე აქტუალურ კულტურულ მოვლენად ვაქციოთ NFL-ის კალენდარში.“
ფანების ნაწილმა კომენტარებში იმედი გამოთქვა, რომ ემინემი, შესაძლოა, თავადაც იყოს შოუს ერთ-ერთი შემსრულებელი.
ჯერჯერობით არ დასახელებულა, თუ ვინ გამოვა 2025 წლის შოუში, რომელიც Ford Field-ზე გაიმართება – იქ, სადაც მადლიერების დღის აღსანიშნავ ტრადიციულ მატჩზე ერთმანეთს Lions და Green Bay Packers დაუპირისპირდებიან.
ნახეთ Detroit Lions-ის ოფიციალური განცხადება:
