ერთ-ერთი ხრიკი, რომელიც D’Angelo-მ თავის სამ სტუდიურ ალბომში გამოიყენა, იყო ის, რომ ალბომში ერთდროულად ჟღერდა 1960-იანი წლების დაკარგული R&B კლასიკა, შორეული სოულ-ბლუზი და მომავლის ფანკი.
თუ Brown Sugar-ის (1995), Voodoo-ს (2000) ან Black Messiah-ის (2014) რეტრო-ფუტურისტული ჟღერადობა არ გაკმაყოფილებთ, The Roots-ის წევრ Questlove-ს თქვენთვის კარგი ამბავი აქვს. გასულ შაბათ-კვირას 2025 წლის როკ-ენ-როლის დიდების დარბაზის ცერემონიის წითელ ხალიჩაზე, The National News Desk-თან საუბრისას, დრამერმა, ოსკარის მფლობელმა დოკუმენტალისტმა და D’Angelo-ს დიდი ხნის კოლაბორაციონისტმა მიანიშნა, რომ სამომავლოდ ახალი ალბომის გამოცემა იგეგმება.
გასულ წელს გავრცელებული ინფორმაციით, მუსიკოსი ნელ-ნელა აგროვებდა ტრეკებს გრემის მფლობელი ალბომის, Black Messiah-ის დიდი ხნის ნანატარი გაგრძელებლისთვის. „ეს ხმა ყოველთვის წარსულიდანაა, თუმცა მომავლისკენაა მიმართული. ამ ჩანაწერსაც იგივე ხასიათი ექნება.” – განაცხადა Questlove-მა.
მიუხედავად იმისა, რომ პროექტზე დამატებითი ინფორმაცია პრესისთვის ამ დრომდე ხელმისაწვდომი არ არის, 2024 წელს Rolling Stone Music Now პოდკასტთან საუბარში კოლაბორაციონისტი რაფაელ სადიკი აღნიშნავდა, რომ მუსიკოსი თავს კარგად გრძნობდა და მუსიკაზე მუშაობდა. “რამდენჯერმე ვესაუბრე – აღფრთოვანებულია. ბევრს არ ვსაუბრობთ, მაგრამ როცა ვსაუბრობთ, ეს სიგიჟეა. მაგალითად, ის მეუბნება: “ამას უნდა მოუსმინო. ბას-გიტარაზე უნდა დაუკრა. ერთი ტრეკი მაქვს, უნდა ჩაერთო, რადგან ის შენზეა შექმნილი.” – აღიშნავდა სადიკი ინტერვიუში.
მისივე თქმით, იმ დროს D’Angelo ექვს კომპოზიციაზე ერთდროულად მუშაობდა და ამით საოცრად აღფრთოვანებული ჩანდა. „ახლა თვითონ მართავს თავის ბედს. მართალია, მენეჯერიც ჰყავს, მაგრამ ვერავინ აიძულებს, ის გააკეთოს, რაც არ სურს. ახლა იცის, რომ ყველაფერი მასზეა დამოკიდებული და ეს მისი სრულიად ახალი მიდგომაა.“
სადიკის თქმით, სიმღერებს შორის, რომლებზეც ისინი მუშაობდნენ, იყო ძველი ტრეკი მათი ადრეული პერიოდიდან, როდესაც მცირე დროით ჩამოაყალიბეს ჯგუფი A Tribe Called Quest-ის Q-Tip-თან ერთად. „ვფიქრობ, ეს ჩანაწერი D’Angelo-ს ახალ ალბომში მოხვდება. ეს არის ჩანაწერი, რომელიც ყველამ ერთად გავაკეთეთ. ბასზე მე ვუკრავ, D’Angelo-ც უკრავს და ფონად ორივე ერთად ვმღერით, ჯანდაბა ეს საოცარი ფანკია, ეს მუსიკა კარგად დაძველდა, კარგი მუსიკა ყოველთვის კარგად ძველდება.” – აღნიშნა სადიკმა.
როგორც მას სჩვეოდა ხოლმე, D’Angelo ათწლეულზე მეტი ხნის წინ რადარიდან გაქრა და მხოლოდ 2018 წელს გამოჩნდა, როდესაც Red Dead Redemption 2-ისთვის ვიდეოთამაშის საუნდტრეკისთვის სიმღერა May I? Stand Unshaken ჩაწერა. 2021 წელს Verzuz-ის სცენაზე არასაკონკურსო ფორმატით, D’Angelo & Friends-ის კონცერტით, აპოლოს თეატრში წარდგა. ეს პრაქტიკულად სოლო შოუ იყო, რომელშიც Method Man & Redman, H.E.R. და The Vanguard-ის ტრომბონისტი ქიონ ჰაროლდი მონაწილეობდნენ.
D’Angelo, კიბოსთან ხანგრძლივი ბრძოლის შედეგად 14 ოქტომბერს გარდაიცვალა. აღსანიშნავია, რომ მუსიკოსი Jay-Z-სთანაც თანამშრომლობდა სიმღერისთვის I Want You Forever, რომელიც ფილმ The Book of Clarence-ის საუნდტრეკების სიაში შევიდა.
