ოლივია დინმა ბილეთების გამყიდველი მსხვილი კომპანიები გააკრიტიკა მას შემდეგ, რაც ფანებმა მისი Art of Loving ტურნეს ბილეთების გადასაყიდი ფასები გაამხილეს.
ბრიტანელმა მომღერალმა ამის შესახებ ინსტაგრამზე დაწერა. პოსტში ის ფანებს ამცნობს, რომ მისი გუნდი ამჟამად მოულოდნელი გადაყიდვის პრაქტიკას იძიებს და გამომწერებს მოუწოდებს, ფრთხილად იყვნენ კომენტარების ველში გამოჩენილ გადამყიდველებთან, რომელთაც მუსიკოსი თაღლითებს უწოდებს.
„ვწუხვარ, რომ ბილეთების ფასები და გადაყიდვა პრობლემაა,” – წერს დინი. „ჩემი გუნდი ახლა ამ საკითხს იძიებს. ძალიან გულდასაწყვეტია, რადგან ვინმეს მოტყუება ან ჩემი კონცერტის ბილეთის ზედმეტ ფასად მიყიდვა უკანასკნელი რამაა, რაც მინდა. გთხოვთ, ფრთხილად იყავით ბილეთების კომენტარების ავტორებისგან ყიდვისას, რადგან უმეტესად ეს თაღლითური სქემაა.”
შემდეგ მომღერალმა ბილეთების მსხვილ კომპანიებს მიმართა, როგორებიც არიან Ticketmaster, Live Nation და Aeg Presents. „თქვენ საზიზღარი მომსახურება გაქვთ. ფასები, რომლითაც გადაყიდვის საშუალებას იძლევით, ამორალურია და სრულიად ეწინააღმდეგება ჩვენს ნებას. ცოცხალი მუსიკა ხელმისაწვდომი უნდა იყოს და ჩვენ უნდა ვიპოვოთ ახალი გზა, რომ ეს შესაძლებელი გავხადოთ. იყავით უკეთესები.”
მანამდე მომხმარებლები სოციალურ მედიაში საუბრობდნენ ბილეთების პლატფორმების გრძელ ვირტუალურ რიგებზე და იმაზე, რომ ოფიციალური ბილეთები გაყიდვისთანავე მეორად ბაზარზე გამოჩნდა, თუმცა მნიშვნელოვნად გაზრდილი ფასებით. ღირებულება განსხვავდებოდა ქალაქების მიხედვით. ზოგიერთ ადგილას გადაყიდვის ფასი რამდენიმე ასეული დოლარითაც კი აღემატებოდა ბილეთის თავდაპირველ საფასურს.
როგორც ჩანს, დინის წუხილი გაიაზრა Ticketmaster-მა. კომპანიამ მომღერლის პოსტი გააზიარა და დაწერა, რომ ამიერიდან პლატფორმა გადაყიდვის ფასის ზღვარს დააწესებდა თავდაპირველ ღირებულებასთან მიმართებით. „ჩვენ მხარს ვუჭერთ არტისტების უფლებას, განსაზღვრონ პირობები, თუ როგორ გაიყიდება და გადაიყიდება მათი ბილეთები. ჩვენ დავაწესებთ გადასაყიდი ბილეთების ღირებულების ზღვარს და იმედი გვაქვს, სხვა კოპანიებიც გამოგვყვებიან.”
ბრიტანელ ავტორ-შემსრულებელს ამჟამად Billboard Hot 100-ის ოთხი სიმღერა აქვს, მათ შორისაა Man I Need, რომელიც 8 ნოემბრით დათარიღებული ჩარტის ტოპ ხუთეულში შევიდა. დინის მეორე ალბომი The Art of Loving კი Billboard 200-ის მერვე ადგილზე გავიდა, რაც ამ დრომდე მუსიკოსის საუკეთესო შედეგია.
ოლივია დინმა 2026 წლის ტურნე გასულ კვირას დააანონსა. ტურნეს ჩრდილოამერიკული ნაწილი ივლისში სან-ფრანცისკოში დაიწყება და ტეხასში დასრულდება.
