ბიონსემ ფორმულა1-ის ლას-ვეგასის გრან-პრიზე შეკრებილ საზოგადოებას სიურპრიზი გაუკეთა და მოულოდნელად ღონისძიებაზე მეუღლესთან ერთად გამოჩნდა.
მომღერალი რბოლაზე სათანადო იმიჯით წარდგა – მას ლუი ვიტონის სპეციალური შეკვეთით შეკერილი შესაფერისი კომბინიზონი ეცვა, რომელიც მკერდამდე ჰქონდა შეხსნილი. ბიონსეს სტუმრობის ამსახველი კადრები F1-ის სოციალურ ანგარიშებზე გამოქვეყნდა.
გრან-პრიზე სტუმრობის ვიდეო ინსტაგრამზე თავად პოპვარსკვლავმაც გააზიარა. ვიდეოში ის „ფერარის” სარბოლო ავტომობილის მგზავრის სავარძელში ჯდება, რომელსაც მსოფლიოს შვიდგზის ჩემპიონი ლუის ჰამილტონი მართავს.
მოგვიანებით კი კამერებმა დააფიქსირეს ჰამილტონი – რომელიც ფორმულა 1-ის მთავარი გადაკვეთის წერტილია მუსიკასა და მოდის ინდუსტრიასთან – როცა ის ბიონსესა და ჯეი-ზის ესაუბრებოდა. ვარსკვლავურ წყვილსა და სპორტსმენს შორის წინა შეხვედრა 2009 წლის გრან-პრიზე შედგა.
ბიონსესა და ჯეი-ზის გამოჩენამ კიდევ უფრო გააძლიერა ლას-ვეგასის გრან-პრის ვარსკვლავური ატმოსფერო, რომელიც სწრაფად იქცა F1-ის ერთ-ერთ ყველაზე გასართობ ღონისძიებად 2023 წლის დებიუტის შემდეგ. თუმცა ისინი არ ყოფილან გრან-პრის ერთადერთი ვარსკვლავური სტუმრები. ავტორბოლის უიკენდის განმავლობაში კამერებმა ასევე დააფიქსირეს ტრევის სკოტი, სინთია ერივო, მაიკლ დუგლასი, კეთრინ ზეტა-ჯონსი, გორდონ რამზი, ბენ აფლეკი და სხვა ცნობილი სახეები, რაც კიდევ ერთხელ ადასტურებს, რომ ლას-ვეგასისა და მაიამის გრან-პრი მთავარ სპორტულ მოვლენასთან ერთად კულტურულ ღონისძიებებსაც წარმოადგენს.
