A$AP Rocky-ს ალბომის – Don’t Be Dumb-ის გამოსვლა არაერთხელ გადაიდო, თუმცა ფანებს ისევ გაუჩნდათ იმედი, რომ 2026 წელს ის საბოლოოდ გამოიცემა. ასეთი ვარაუდი მას შემდეგ გაჩნდა, რაც მაყურებლებმა რეპერის სამოსში თითქოს მინიშნება აღმოაჩინეს. ეს მოხდა Camp Flog Gnaw-ის სცენაზე, სადაც A$AP Rocky 23 ნოემბერს გამოვიდა.
Rocky-მ თავისი სეტი შთამბეჭდავად დაიწყო – სცენაზე ვერტმფრენის კიდეზე ჩამოკიდებული, მეგაფონით ხელში გამოჩნდა. მოგვიანებით, როცა ქურთუკი გაიხადა, გამოჩნდა ჰუდი, რომლის სახელოზეც ციფრები იყო გამოსახული.
“01162026” – ეს იყო შავად დატანილი წარწერა, რაც ბევრმა აღიქვა, როგორც მინიშნება შესაძლო თარიღზე, უფრო კონკრეტულად კი – 2026 წლის 16 იანვარზე.
16 იანვარი პარასკევია – ტრადიციული დღე ალბომის გამოსაშვებად. თუმცა ზოგიერთი მსმენელი სკეპტიკურად არის განწყობილი. მათ გაიხსენეს, რომ 16 იანვარს აშშ-ში National Nothing Day აღინიშნება და წარწერასაც, შესაძლოა, უბრალოდ ეს მნიშვნელობა ჰქონდა.
უკვე წლებია, Don’t Be Dumb-ის გამოსვლის არაერთი თარიღი დადასტურდა და შემდეგ ისევ გადაიდო, ამიტომ ჯერ კიდევ უცნობია, არის თუ არა 16 იანვარი ის დღე, როცა რეპერი ხმაურიანად დაანონსებულ ალბომს ბოლოს და ბოლოს გამოსცემს.
A$AP Rocky-ს ბოლო ალბომი – TESTING 2018 წელს გამოვიდა.
