Flea თავის პირველ სოლო სინგლში მარტივ გზავნილს ავრცელებს: „იცხოვრე მშვიდობისთვის, იცხოვრე სიყვარულისთვის“. ეს გულწრფელი, მოწოდება რვაწუთიან კომპოზიციაში A Plea თითქმის ხუთი წუთის განმავლობაში ისმის, ვიდეოკლიპი კი 2 დეკემბერს გამოქვეყნდა.
თავისუფალი ჯაზისა და სიტყვათა თანწყობის ნარევი კომპოზიცია Red Hot Chili Peppers-ის ბასისტის, Flea-ს მომავალი და ჯერ კიდევ უსახელო სადებიუტო სოლო ალბომის პირველი სინგლია, რომელიც მომავალ წელს Nonesuch Records-ზე გამოვა. მიუხედავად იმისა, რომ არტისტი ყველაზე მეტად Red Hot Chili Peppers-ში ენერგიული ბას-გიტარისტის სახელით არის ცნობილი, Flea სადებიუტო ალბომში თავის პირველ ინსტრუმენტს, საყვირს უბრუნდება, რომლის შესახებაც არტისტმა თქვა: „ეს არის თანამედროვე ჯაზის მოყვარულთა საოცნებო ბენდი.” ალბომში მოწვეული არტისტებისა და სიმღერების სიის შესახებ დეტალები მომავალი წლის დასაწყისში გახდება ცნობილი.
მანამდე კი Flea-მ დინამიური ვიდეოკლიპი გამოაქვეყნა კომპოზიციაზე – A Plea. კლიპის რეჟისორიც მისი უფროსი ქალიშვილი, ფოტოგრაფი კლარა ბალზარია. Flea ცარიელ სივრცეში თანამედროვე ქორეოგრაფიული სტილის მოძრაობებს ასრულებს, ამ ყველაფერს კი კომპოზიციის დინამიური ჯაზური რიტმი კრავს.
სიმღერა სრულად Flea-ს მიერაა დაწერილი და შესრულებული და ასევე ელექტრო ბასისა და საყვირის ხმებთან ერთად გილ სკოტ-ჰერონის მსგავს სასაუბრო სტილში შესრულებულ ვოკალს მოიცავს.
ტრეკზე Flea-სთან ერთად ასევე მონაწილეობენ: კონტრაბასისტი – ანა ბატერსი (Boygenius), გიტარისტი – ჯეფ პარკერი (Tortoise), დრამერი – დინტონი პარკსი (We Are Dark Angels), პერკუსიონისტი – მაურო რეფოსკო (დევიდ ბირნი), ალტ ფლეიტისტი – რიკი ვაშინგტონი და ტრომბონისტი – ვიკრამ დევასტჰალი (ანჯელ ოლსენი). დამატებით ვოკალის ნაწილში კი Flea-ს უერთდებიან კრის უორენი – (The DX Band) და სიმღერის პროდიუსერი ჯოშ ჯონსონი – (ლეონ ბრიჯესი), რომელიც ასევე ალტ საქსოფონზე უკრავს.
განცხადებაში Flea-მ აღნიშნა, რომ სიმღერის ტექსტი ქვეყანაში და მსოფლიოში მიმდინარე დაპირისპირებებს აღწერს: „სივრცე, რომელიც ყველაფერს სცდება – სიყვარულია, სადაც შემიძლია აზრის თავისუფლად დაფიქსირება. ყოველთვის ვცდილობ, ვიყო საკუთარი მე. არ მაინტერესებს პოლიტიკა. ვფიქრობ, რომ არსებობს გაცილებით უფრო ტრანსცენდენტული ადგილი, რომელიც პოლიტიკაზე მაღლა დგას, სადაც რეალური დიალოგი შესაძლებელია. ვიცხოვროთ ჰარმონიულად და პროდუქტიულად ისე, რომ ეს ჯანსაღი იყოს მსოფლიოსთვის. ვფიქრობ, არსებობს ადგილი, სადაც ერთმანეთს ვხვდებით და ეს ადგილი სიყვარულია“.
მიუხედავად იმისა, რომ Flea 1982 წლიდან Red Hot Chili Peppers-ის ბას-გიტარისტია, იგი ასევე უკრავდა არაერთ სუპერჯგუფში, მათ შორის Radiohead-ის ვოკალისტის, ტომ იორკის Atoms For Peace-ში. მას ასევე უმუშავია ისეთ მუსიკოსებთან, როგორებიც არიან: Circle Jerks, ტომ უეიტსი, ჯონი ქეში, ალანის მორისეტი, Nirvana და Jane’s Addiction. Flea ასევე მონაწილეობდა კინოსა და სატელევიზიო პროექტებშიც, ასრულებდა ეპიზოდურ როლებს, მათ შორის Back to the Future Pt. II, My Own Private Idaho, Inside Out 2, Fear and Loathing in Las Vegas, Baby Driver, The Big Lebowski და Obi-Wan Kenobi და სხვა.
ნახეთ Flea-ს ახალი ვიდეო A Plea:
