დუა ლიპამ Radical Optimism-ის ერთწლიანი ტურნეს უკუთვლა დაიწყო. პირველ დეკემბერს ბრიტანელმა ვარსკვლავმა მეხიკოში დაგეგმილი დასკვნითი სამი კონცერტის პირველი შოუ გამართა. საღამოს დამაგვირგვინებელი მომენტი კი მექსიკელი პიანისტისა და კომპოზიტორის, კონსუელო ველასკესის საკულტო სიმღერის, Besame Mucho-ს შესრულება იყო.
ტურნეს განმავლობაში ლიპამ პირობა შეასრულა, ადგილობრივი არტისტის სიმღერის ქავერით პატივი მიეგო თითოეული ქვეყნისთვის, რომელსაც ესტუმრებოდა. კონცერტამდე რამდენიმე დღის განმავლობაში აქტიურად მიმდინარეობდა მსჯელობა, თუ რომელ მექსიკურ სიმღერას აირჩევდა არტისტი.
„დღეს, მინდა, პატივი მივაგო დიდ მექსიკელ კომპოზიტორს, კონსუელო ველასკესს, ვისი სიმღერაც ამდენი ადამიანის გულებშია მთელი მსოფლიოს მასშტაბით,” – თქვა მომღერალმა ესპანურად. „ეს სიმღერა მისი ისტორიის გამო მიყვარს – როცა მან ის დაწერა, ჯერ არავის ეკოცნა მისთვის. მე კი მჯერა, რომ კომპოზიტორები თავიანთ ოცნებებს წერენ, რათა ისინი ახდნენ.”
Bésame Mucho ერთ-ერთი ყველაზე ხშირად შესრულებული სიმღერაა. მისი ქავერი უმღერიათ ისეთ არტისტებს, როგორებიც არიან ლუის მიგელი, ანდრეა ბოჩელი, ფრენკ სინატრა, ნატ კინგ კოლი, დალიდა და The Beatles.
მანამდე დუა ლიპამ მადრიდში ფანები ენრიკე იგლესიასის Héro-ს სიმღერით გააოცა, არგენტინაში კი Soda Stereo-ს De Música Ligera შეასრულა. ჩილეში მონ ლაფერტეს Tu Falta de Querer და La Ley-ს El Duelo იმღერა, ბრაზილიაში – სერჟიო მენდეშის Magalenha, პერუში – Cariñito, კოლუმბიაში კი შაკირას Antología შეასრულა.
სასიამოვნო სიურპრიზი იყო ისიც, რომ ლიპამ გულშემატკივარს ესპანურად მიმართა. მან მადლობა გადაუხადა მექსიკელ აუდიტორიას მასზე ზრუნვისთვის და იმისთვის, რომ თავი სახლში აგრძნობინეს.
„ამ ღამეზე მას შემდეგ ვოცნებობ, რაც ტურნე დავიწყე. სულ ვფიქრობდი, თუ როგორი იქნებოდა აქ დაბრუნება,” – თქვა მან. „ეს კონცერტები ჩემთვის ისეთი აღმაფრთოვანებელია, რადგან ტურნეს ბოლო შოუებია. ძალიან მადლიერი ვარ. მუდმივად იმ საოცარ მოგონებებზე ვფიქრობ, რაც ამ წელს დამიგროვდა. დღეს ღამე თქვენთან ერთად ყოფნა კი ამ ყველაფრის გვირგვინია – ერთადერთი დასასრული, რომელსაც ამ ტურნესთვის ვისურვებდი.”
ტურნეს ბოლო ორი კონცერტი 2 და 5 დეკემბერს გაიმართება.
