გიორგი მიქაძე ახალ ალბომზე იწყებს მუშაობას. ინფორმაციას ამის შესახებ მუსიკოსი სოციალურ ქსელში აქვეყნებს. ქართველი პიანისტის თქმით, ალბომი, სახელწოდებით Georgian Songbook Vol. 2, იანვარში ჩაიწერება და მასში მონაწილეობას ჯაზბასისტი ლარი გრენედერი და ჯაზდრამერი ჯეფ ბალარდი მიიღებენ.
„ოცნებები ხდება და ძალიან სწორ დროს. იანვარში ახალ ალბომს ჩავწერ ლეგენდარულ არტისტებთან, ლარი გრენედერსა და ჯეფ ბალარდთან ერთად. ურიცხვი საათები მაქვს გატარებული მათ მოსმენაში, როცა ბრედ მელდოუსთან უკრავდნენ. ახლა კი ჩვენ ერთად ვიქნებით სტუდიაში,” – წერს მუსიკოსი.
Georgian Songbook Vol. 1 მუსიკოსმა 2023 წელს გამოსცა. მასში შესულია გია ყანჩელის, ჯანსუღ კახიძის, დავით თორაძის, სულხან ცინცაძისა და სხვა ცნობილი ქართველი კომპოზიტორების ნაწარმოებები. ალბომის პირველი ნაწილი პარიზში ჩაიწერა. მასში ფრანგი მუსიკოსები: ფრანსუა მუტენი (კონტრაბასი) და რაფაელ პანიე (დრამერი) მონაწილეობენ.
