ბიონსეს შეუძლია მაღალი მოდა უბრალო თეთრ მაისურსა და ჯინსებში წარმოაჩინოს და სწორედ ესაა, რის გამოც ის იდეალური კანდიდატია მოდის უდიდესი საღამოს თანათავმჯდომარეობისთვის.
როგორ ცნობილი გახდა, პოპვარსკვლავი 2026 წლის „მეტ გალას” უხელმძღვანელებს. აღნიშნულ სტატუსს მასთან ერთად ოსკაროსანი ნიკოლ კიდმანი და ჩოგბურთის ლეგენდა ვენუს უილიამსი გაიზიარებენ. ინფორმაცია „ვოგის” ინსტაგრამ პოსტით გახდა ცნობილი. თავმჯდომარეების სახელებთან ერთად გამჟღავნდა ღონისძიების თემაც: „კოსტიუმის ხელოვნება”.
„2026 წლის ‘მეტ გალა’ პატივს მიაგებს კოსტიუმების ინსტიტუტის გამოფენას, სახელწოდებით ‘კოსტიუმის ხელოვნება,’”- ვკითხულობთ პოსტის აღწერაში. „ვინ ჩაიბარებს დღესასწაულის მასპინძლობას? მსოფლიოს გასართობი, სპორტისა და მოდის ინდუსტრიის მთავარი მოთამაშეები.”
თავმჯდომარეების ვინაობასა და ღონისძიების თემასთან ერთად „ვოგმა” ვებგვერდზე საორგანიზაციო კომიტეტის შემადგენლობაც დაასახელა. კომიტეტს ენთონი ვაკარელო და ზოი კრავიცი გაუძღვებიან. მისი წევრები კი იქნებიან: საბრინა კარპენტერი, ლისა, Doja Cat, სემ სმითი და სხვა ცნობილი სახეები.
რაც შეეხება „მეტ გალას” თემას, რომელიც, ტრადიციისამებრ, ნიუ-იორკის ხელოვნების მუზეუმის გამოფენის გახსნას დაუკავშირდება, წელს მისი კურატორი ენდრიუ ბოლტონი იქნება. „ვოგის” ინფორმაციით, „‘კოსტიუმის ხელოვნება’ აღმოაჩენს კავშირს ტანისამოსსა და სხეულს შორის სხეულის თემატური ტიპების მიხედვით, დაწყებული შიშველი, დასრულებული ორსული და ხანშიშესული სხეულებით.”
ახალი ამბავი განსაკუთრებით სასიხარულოა ბიონსესა და მისი ფანებისთვის, რომელთაც პოპვარსკვლავი „მეტ გალაზე” 2016 წლის შემდეგ არ უნახავთ.
ნახეთ „ვოგის” პოსტი:
