R&B-ის შემსრულებელი ვარსკვლავი SZA თეთრი სახლის ბოლო პიარ ტაქტიკას აკრიტიკებს. 10 დეკემბერს X-ზე გამოქვეყნებულ პოსტში არტისტი დონალდ ტრამპის ადმინისტრაციას ონლაინ სივრცეში ცნობილი ადამიანების განზრახ გაღიზიანების და გაბრაზების მცდელობაში ადანაშაულებს.
თავისი ყოფილი მენეჯერის, ტერენს ჰენდერსონის პოსტზე გამოხმაურებისას SZA-მ დაწერა: „თეთრი სახლის მიერ არტისტების აგრესიის გამოწვევა და ამის უფასო პიარისთვის გამოყენება სიბნელის კულმინაციაა“.
გრემის მფლობელმა შემსრულებელმა ადმინისტრაციის ქმედებები და „შოკისა და გაოცების ტაქტიკის“ გამოყენება მკაცრად გააკრიტიკა და ამ სტრატეგიას „ბოროტება და ამავდროულად მოსაწყენი“ უწოდა.
Billboard-მა კომენტარისთვის თეთრ სახლს მიმართა.
თავდაპირველ პოსტში SZA-ს ყოფილი მენეჯერი, Top Dawg Entertainment-ის აღმასრულებელი დირექტორი წერდა: „არტისტების პროვოცირება, რათა მათ პროპაგანდას და პოლიტიკური დღის წესრიგის გავრცელებას შეუწყონ ხელი, ბინძური თამაშია. შეწყვიტეთ ეს!“.
მიუხედავად იმისა, რომ არ დაუკონკრეტებიათ, ზუსტად რას გულისხმობდნენ, SZA-ს და ტერენს ჰენდერსონის პოსტები, სავარაუდოდ, ეხებოდა ბოლოდროინდელ ტენდენციას, რომლის მიხედვით, თეთრი სახლის ოფიციალური სოციალური მედიის ანგარიშები ცნობილი ლიბერალი არტისტების მუსიკის ფონზე შექმნილ ვიდეოებს აქვეყნებენ.
დეკემბერში თეთრმა სახლმა გამოაქვეყნა აშშ-ის ემიგრაციისა და საბაჟო აღსრულების სამსახურის (ICE) ვიდეო, რომელშიც გამოყენებული იყო სიმღერა – Juno. ოფიცრების კოლაჟში ჩანდა, როგორ მისდევდნენ და ხელბორკილებს ადებდნენ ადამიანებს ქუჩებში, ფონად კი Short n’ Sweet-ის ჰიტი Juno ჟღერდა. პოსტს კარპენტერის პასუხი მოჰყვა: „ეს ვიდეო ბოროტი და ამაზრზენია,”– დაწერა კარპენტერმა X-ზე. „არასოდეს გამოიყენოთ ჩემი მუსიკა თქვენი არაადამიანური დღის წესრიგის სასარგებლოდ.” კრიტიკის შემდეგ თეთრმა სახლმა ვიდეო წაშალა. კარპენტერის მიერ გამოთქმული პროტესტის შემდეგ, Newsweek-თან გაზიარებულ პასუხში თეთრი სახლის სპიკერმა აბიგეილ ჯექსონმა თქვა: „ჩვენ ბოდიშს არ მოვიხდით ჩვენი ქვეყნიდან სახიფათო კრიმინალების – მკვლელების, მოძალადეებისა და პედოფილების დეპორტაციისთვის.”
ნოემბერში ოლივია როდრიგომ ადმინისტრაცია გააკრიტიკა იმის გამო, რომ ICE-ის ვიდეოში მისი სიმღერა – All-American Bitch გამოიყენეს. მომღერალმა მაშინ დაწერა: „არასოდეს გამოიყენოთ ჩემი სიმღერები თქვენი რასისტული, სიძულვილით სავსე პროპაგანდის გასავრცელებლად“.
თეთრი სახლის ადმინისტრაციამ TikTok ვიდეოსთვის ასევე გამოიყენა ტეილორ სვიფტის სიმღერა – The Fate of Ophelia, რასაც სვიფტის ფანების დიდი უკმაყოფულება მოჰყვა.
