გრემის ხმის მიცემის საბოლოო რაუნდი 12 დეკემბერს იწყება. საუკეთესო ალბომის ყდისთვის წარდგენილი ხუთი ნომიმანტიდან კი ოთხი ალბომის ყდა თავად შემსრულებელ არტისტებს ეკუთვნით.
ტაილერ ოკონმა, ცნობილი, როგორც Tyler, The Creator, ნომინაციაში წარდგენილია, როგორც საკუთარი ალბომის, Chromakopia-ს არტდირექტორი. მისი მეტოქეები არიან ბენიტო ანტონიო მარტინეს ოკასიო, ცნობილი, როგორც Bad Bunny, ალბომისთვის Debí Tirar Más Fotos; ჯო კერი, იგივე Djo ალბომისთვის The Crux და რაიან ტესდეილი ალბომისთვის moisturizer.
ერთადერთი ნომინანტი საუკეთესო ალბომის ყდის კატეგორიაში, რომლის ავტორიც მისივე შემსრულებელი არ არის, Perfume Genius-ის ალბომი Glory-ა.
ხმისჩამწერმა აკადემიამ წელს ხელახლა ჩაუშვა საუკეთესო ალბომის ყდის კატეგორია, თუმცა ნომინაცია სათავეს 1959 წელს გრემის პირველი ცერემონიიდან იღებს. მაშინ ეს კატეგორია ფრენკ სინატრამ მოიგო, როგორც არტდირექტორმა საკუთარი ალბომისა Frank Sinatra Sings for Only the Lonely. ამავდროულად, სინატრას ალბომი წლის ალბომის ნომინაციაშიც იყო წარდგენილი. წელს კი იმავე სცენარს იმეორებს ტაილერის Chromakopia და Bad Bunny-ს Debí Tirar Más Fotos.
ახალი კატეგორიის დაანონსებისას ხმისჩამწერი აკადემიის აღმასრულებელმა დირექტორმა ჰარვი მესონ ჯუნიორმა განაცხადა: „ეჭვგარეშეა, რომ დღევანდელ ციფრულ სამყაროში ალბომების ყდები კიდევ უფრო მნიშვნელოვანია, ვიდრე ოდესმე. არსებობს საკულტო ყდები, რომლებსაც ერთი შეხედვითაც ცნობ, იმ შემთხვევაშიც კი, თუ ეს ალბომი ფიზიკურად არასდროს გქონია. მათი კულტურული მნიშვნელობა უდავოა. სწორედ ეს არის ერთ-ერთი მიზეზი, რის გამოც ვიფიქრეთ, რომ ეს კატეგორია აუცილებელი იყო.”
ალბომების არტმიმართულების ჩამოყალიბებაში დიდ როლს ასრულებენ თავად მუსიკოსები. გრემის არსებობის პირველი 32 წლის განმავლობაში სინატრა ერთადერთი არტისტი იყო, რომელსაც ჯილდო საკუთარი ალბომის არტდირექტორობისთვის ჰქონდა მიღებული. ბოლო 35 წლის განმავლობაში კი ათმა არტისტმა მოახერხა არტდირექტორის ჯილდოს მოპოვება ალბომის საუკეთესო შეფუთვის ნომინაციაში.
როცა 7 ნოემბერს გრემის ნომინაციები გამოცხადდა, Chromakopia-ს არტდირექტორებად შონ ლეველინი და ლუის პერესი იყვნენ დასახელებული. თუმცა 9 დეკემბერს ისინი სიიდან ამოიღეს და მათ ნაცვლად თავად ტაილერი ჩასვეს. იგივე მოხდა Djo-ს შემთხვევაშიც. თავდაპირველად მისი ალბომის ყდისთვის გრემის ნომინანტად უილიამ უესლი იყო დასახელებული, რომელსაც ასევე 9 დეკემბერს თავად Djo-ც მიემატა.
ხმის მიცემის ბოლო ეტაპი 5 იანვრამდე გაგრძელდება. გრემის 68-ე დაჯილდოება კი პირველ თებერვალს შედგება.
