17 დეკემბერს Tatuza Jazz Club-ში საერთაშორისო კამერული მუსიკის საღამო გაიმართა. მსმენელის წინაშე Karajan Academy წარდგა. სტუმრებს შესაძლებლობა ჰქონდათ, მოესმინათ შოსტაკოვიჩის, სილვესტროვის, რიხმისა და შუმანის ნაწარმოებები, ნინო კასრაძის ლიტერატურულ ჩართვებთან ერთად.
მუსიკალური კოლექტივის შემადგენლობაში იყვნენ: ჰარი ფრედერიკ კელერ უორდი – ვიოლინო, ბეატა ანტიკაინენი – ჩელო და ნორა ტუულია ილიონენი – პიანინო. ღონისძიება Into the Open ფესტივალის ფარგლებში ჩატარდა.
Into the Open მულტიმედიური საკონცერტო გამოცდილებაა, რომელსაც საფუძველი გერმანიაში ჩაეყარა. 2023 წლის იანვარში ფესტივალი ბერლინში გაიმართა, 2024 წელს კი მუსიკალური საღამოები სოხუმის თეატრის სცენაზე შედგა. Into the Open საქართველოში წინანდლის ფესტივალის დირექტორის, დავით საყვარელიძის ხელშეწყობით გაიმართა.
დავით საყვარელიძე:
„ეს ფესტივალი მულტიმედიური ღონისძიებაა, რომელიც ხელოვნების სხვადასხვა ფორმას ერთმანეთთან აკავშირებს. მე ფესტივალის შემოქმედებით პროცესებში აქტიურად ვარ ჩართული. როგორც იცით, Into the Open შარშან სოხუმის თეატრის სივრცეში გაიმართა. წელს ფესტივალის ფარგლებში ერთ-ერთ გამორჩეულ კონცერტს Tatuza Jazz Club მასპინძლობს. მსგავსი ფორმატის ღონისძიება გერმანიაში უკვე გაიმართა, თბილისში კი Karajan Academy მუსიკალურ პროგრამას ნინო კასრაძესთან ერთად წარმოადგენს.“
ნინო კასრაძე:
„მუსიკა და პოეზია ხელოვნების ორი ფორმაა, რომლებიც ერთმანეთთან ძალიან ახლოს არიან და ხშირად იკვეთებიან. ამ საღამოს პროგრამისთვის შევარჩიეთ ისეთი ავტორების ნაწარმოებები, როგორებიც არიან ტერენტი გრანელი, პაოლო იაშვილი, პაატა შამუგია და ზვიად რატიანი.“
ჰარი ფრედერიკ კელერ უორდი:
„საქართველოში ადრეც ვარ ნამყოფი, მქონდა შესაძლებლობა, მსმენელს წინანდლის ფესტივალის სცენიდან გავცნობოდი. ქართველები ძალიან ახლოს არიან კლასიკურ მუსიკასთან. Tatuza Jazz Club-ის სივრცე არაჩვეულებრივია და ამ გარემოში პოეზიისა და კლასიკური მუსიკის გადაკვეთა კიდევ უფრო საინტერესოდ ჟღერს.“
