12 მარტს კარნეგი-ჰოლში ბილი ჯოელისადმი მიძღვნილი ღონისძიება გაიმართება. საქველმოქმედო კონცერტზე, რომელიც საბავშვო მუსიკალურ პროგრამებს დაეხმარება, ჯოელის სიმღერები შესრულდება. მიწვეულ ვოკალისტებს შორის არიან: რობ თომასი, ჯოელის ქალიშვილი ალექსა რეი ჯოელი, მერი ჩეპინ კარპენტერი, პეტ მონაჰანი, გევინ დეგრიუ, ბეტი ლავეტი, მეტ ნათანსონი და სხვები. სცენაზე მათ ჯოელის ლაივ ბენდიც შეუერთდება. მონაწილე არტისტების სრული სია უახლოეს დღეებში გამოქვეყნდება.
კონცერტი მაიკლ დორფის ორგანიზებით, მისივე Music Of პროგრამის ფარგლებში გაიმართება. ის რიგით 21-ე ღონისძიება იქნება სერიისა, რომელმაც 20 წლის განმავლობაში ნიუ-იორკის მუსიკალური განათლების პროგრამებისთვის 2 მილიონი დოლარის მობილიზება შეძლო. გასული წლების კონცერტების მთავარი გმირები იყვნენ: ბრიუს სპრინგსტინი, Rolling Stones, პატი სმითი, ბობ დილანი, პოლ მაკარტნი, დევიდ ბოუი და სხვები.
ჯოელს ამჟამად შემოქმედებითი პაუზა აქვს. ცოტა ხნის წინ მას ე.წ. ნორმალური წნევის ჰიდროცეფალიის დიაგნოზი დაუსვეს და ამ ეტაპზე რეაბილიტაციის კურსს გადის. ჯანმრთელობის მდგომარეობის გამო მუსიკოსს 2025 წელს დაგეგმილი ყველა კონცერტის გაუქმება მოუწია. ბილი მაერისთვის ივლისში მიცემულ ინტერვიუში ჯოელმა თქვა, რომ თავს კარგად გრძნობდა, თუმცა დაამატა: „ჯერ ყველაფერი მოგვარებული არ არის… მუშაობა კვლავ გრძელდება.”
„ჩემი ბალანსი საშინელია. თითქოს გემზე ვარ. ჩემს მდგომარეობას ადრე „ტვინში წყალს” ეძახდნენ, ახლა კი ნორმალური წნევის ჰიდროცეფალია ჰქვია,” – ამბობდა მუსიკოსი.
