არტისტმა ninasamani-მ ახალი სინგლი Betoni წარადგინა, სადაც საკუთარი შინაგანი მდგომარეობა უბრანულ გარემოსა და სივრცით შეგრძნებას დაუკავშირა. სიმღერის ინსპირაცია მისი ოთახის ატმოსფეროდან გამომდინარეობს, სადაც ბეტონის ჭერი და ოთახის აკუსტიკა იმ ემოციური ფონის ნაწილად იქცა, რომლითაც საბოლოოდ მუსიკალური ნამუშევარი შეიქმნა.
სიმღერა შემოქმედებით პროცესში არსებულ ფიქრებსა და შინაგან შეგრძნებებს გამოხატავს, სადაც ქალაქი უცვლელი რეალობის ანარეკლია. ეს კონტრასტი კი მკაფიოდ იკითხება სიმღერის ხასიათში.
Ninasamani:
„ჩემს ოთახში ბეტონის ჭერი მაქვს. ეს ჭერი მომწონს, ოთახის საუნდმა და ბუნებრივმა რევერბერაციამ მომცა ინსპირაცია, რომ ჩემი იმდროინდელი მდგომარეობა მუსიკაშიც გადმომეტანა. მუშაობის პროცესში ბევრი ფიქრი და შინაგანი ქაოსი მქონდა და ეს ჭერიც ძალიან “მაჭერდა”. ხშირად გარეთ გასვლა მინდოდა, თუმცა ქალაქშიც იგივე ბეტონის გარემო მხვდებოდა. საბოლოოდ ერთი პარკი აღმოვაჩინე, სადაც თავს უფრო მშვიდად ვგრძნობ.”
აღსანიშნავია, რომ სიმღერის ვიზუალური მხარეც სრულად ავტორს ეკუთვნის:
„თავიდანვე მქონდა წარმოდგენა, როგორი უნდა ყოფილიყო ვიდეო. გადავიღე და დავამონტაჟე მარტომ. ეს მიმართულება ძალიან მომწონს და ჩემთვის ბუნებრივი პროცესია. 90-იანების სტილი ავირჩიე, რადგან ვფიქრობ, ამ ჟანრის ხასიათს ყველაზე ზუსტად სწორედ ეს პერიოდი გამოხატავს.”
მოისმინეთ Ninasamani-ის სინგლი Betoni, რომელოც პირადი გამოცდილების, სივრცითი ფორმისა და ემოციური შეგრძნების სინთეზია.
