ჯერი კასენეცი, რომელიც ჯეფ კაცთან ერთად 1960-იანი წლების „ბაბლგამ” მუსიკის ყველაზე ცნობილი პროდიუსერი იყო, 6 დეკემბერს საავადმყოფოში გარდაიცვალა. ის 82 წლის იყო. გარდაცვალების მიზეზად სახლში დაცემის შედეგად გამოწვეული გართულებები დასახელდა.
1967-68 წლებში კასენეცმა და კაცმა 6-მილიონიანი გაყიდვების მქონე სინგლები გამოსცეს, მათ შორის ხუთი Billboard Hot 100-ის ტოპ ხუთეულში მოხვდა: The Music Explosion-ის Little Bit o’ Soul (მე-2 ადგილი), Ohio Express-ის Yummy Yummy Yummy (მე-4 ადგილი) და 1910 Fruitgum Co-ს Simon Says (მე-4 ადგილი), 1,2,3 Red Light (მე-5 ადგილი) და Indian Giver (მე-5 ადგილი). სამი მილიონი გაყიდვის მქონე სინგლი, რომელიც ტოპხუთეულში ვერ მოხვდა, Ohio Express-ის Chewy Chewy იყო (მე-15 ადგილი).
1968 წელს ისინი თავად შევიდნენ Hot 100-ის ტოპ 30-ში, როგორც არტისტები. კასენეცი და კაცი Quick Joey Small (Run Joey Run)-ს ასრულებდნენ, რითაც ჩარტის 25-ე ადგილზე მოხვდნენ.
1969 წელს კასენიც-კაცის კიდევ ერთი პროდუქტი მოხვდა Hot 100-ში, როცა Crazy Elephant-ის Gimme Gimme Good Lovin მე-12 ადგილზე გავიდა.
„ბაბლგამ” მუსიკამ პოპულარობის პიკს ჰარდ როკის აღზევების პარალელურად მიაღწია. 1969 წლის ბესტსელერი სინგლი კი The Archies-ის Sugar, Suga გახდა. 1970-იან წლებში მიმდინარეობამ პოპულარობა დაკარგა, თუმცა მან გავლენა მოახდინა ისეთ პოპჰიტებზე, როგორებიცაა Edison Lighthouse-ის Love Grows (Where My Rosemary Goes) და The Grass Roots-ის Sooner or Later. ადრეულ შოუებზე Talking Heads-იც ასრულებდა 1-2-3 Red Light-ს.
1943 წელს დაბადებული ჯერი კასენეცი ჯეფ კაცს არიზონას უნივერსიტეტში შეხვდა, სადაც მათ Clark Five-ის კონცერტი გამართეს. მათი პირველი პროდუქტი R&B მომღერლის, Christine Cooper-ის S.O.S. Hearts in Distress იყო.
კასენეცი და კაცი არასდროს ყოფილან გრემის, ისევე, როგორც კომპოზიტორთა დიდების დარბაზის ნომინანტები. თუმცა მათ უდავოდ ჰქონდათ ნაპოვნი თავიანთი ნიშა, სადაც ჰიტს ჰიტზე ქმნიდნენ.
