James Bond-ის შესახებ ფილმისთვის თემის დაწერა მუსიკაში ერთ-ერთ ყველაზე პრესტიჟულ მიღწევად ითვლება, Oasis-ის ნოელ გალაგერი კი მზად არის, ამ გამოწვევაში ჩაერთოს.
James Bond-ის ლეგენდარული ფილმის მომავალ გადაღებებზე მითქმა-მოთქმა არ წყდება, სწორედ ამასთან დაკვაშირებით ნოელ გალაგერმა ორშაბათს TalkSports-თან ინტერვიუში თქვა, რომ დიდი სიამოვნებით დაწერდა James Bond-ის მომდევნო ფილმისთვის მთავარ მუსიკალურ თემას. კითხვაზე, რას უპასუხებდა, თუ ამ წინადადებას ბონდის მრავალწლიანი პროდიუსერი ბარბარა ბროკოლი შესთავაზებდა, ნოელმა ხუმრობით აღნიშნა: „ვეტყოდი – კარგი, ძვირფასო”.
„რა თქმა უნდა, დავთანხმდებოდი. ეს უდიდესი პატივი იქნებოდა! ვფიქრობ, ასეთი რამ ბრიტანელებმა უნდა გააკეთონ და არა ამერიკელებმა.“ – განაგრძო მან.
მანჩესტერში დაბადებულმა მუსიკოსმა ასევე დაამატა, რომ მომდევნო ფილმში ბოროტმოქმედის როლსაც სიამოვნებით ითამაშებდა, კერძოდ – „მანჩესტერელი ბოროტმოქმედის“.
მუსიკოსის კომენტარები იმ ფონზე კეთდება, როცა სულ უფრო მატულობს მსჯელობა იმაზე, თუ ვინ განასახიერებს ჯეიმს ბონდს 26-ე ფილმში, რომლის დეტალებიც დიდი ხანია, გასაიდუმლოებულია. სავარაუდო შემსრულებლებს შორის დასახელდნენ კალუმ ტერნერი, აარონ ტეილორ-ჯონსონი, რეჯე-ჟან პეიჯი, ჰენრი გოლდინგი და დამსონ იდრისი. ეს როლი ბოლო ხუთ ფილმში დენიელ კრეიგს ჰქონდა შესრულებული, თუმცა გამოცემა Deadline-მა გასული წლის სექტემბერში გაავრცელა ინფორმაცია, რომ რეჟისორი დენის ვილნევი როლისთვის უცნობ ბრიტანელ მსახიობს ეძებს.
მიუხედავად იმისა, რომ ნოელმა მკაფიოდ დააფიქსირა თავისი პოზიცია ამერიკელების ჩართულობაზე, ტრადიციულად, ფილმში არაერთი წარმატებული თემა სწორედ აშშ-ში დაბადებულმა არტისტებმა შექმნეს და შეასრულეს: ყველაზე ბოლოს, ბილი აილიშმა და ფინეასმა ოსკარი მიიღეს სიმღერისთვის No Time to Die, ხოლო კარლი საიმონი, Madonna, რიტა კულიჯი, ნენსი სინატრა, ჯეკ უაითი და ალიშა კისი თავიანთი სიმღერებით Billboard Hot 100-ის ჰიტებშიც მოხვდნენ.
