როგორც ჩანს, Diddy ჯერ კიდევ არ უნდა ელოდოს შეწყალებას დონალდ ტრამპისგან. ამ კვირას The New York Times-თან ინტერვიუში პრეზიდენტმა გაამხილა, რომ მის გეგმებში ამ ეტაპზე რეპერის შეწყალება არ შედის. კომბსს 50-თვიანი პატიმრობა აქვს მისჯილი მას შემდეგ, რაც სასამართლომ დამნაშავედ ცნო პროსტიტუციასთან დაკავშირებულ ბრალდებებში.
ტრამპის თქმით, რეპერმა მას ხელნაწერი წერილი გაუგზავნა, სადაც შეწყალებას სთხოვდა, თუმცა პრეზიდენტი თხოვნას კვლავ არ განიხილავს. წერილის დეტალები უცნობია. როცა თეთრი სახლის წარმომადგენლებს მისი ასლის წარდგენა სთხოვეს, მათ ტრამპის კომენტარებზე მიუთითეს: „მან შეწყალება მთხოვა,” – აღნიშნა მან. „წერილით.”
მანამდე, ოქტომბერში, Diddy-ს შეწყალების თემა ტრამპმა ოვალურ კაბინეტშიც ახსენა. „ბევრი ადამიანი მთხოვს შეწყალებას,” – უთხრა მან ჟურნალისტებს. „მე პაფ დედის ვეძახი, მანაც მთხოვა შეწყალება.”
აგვისტოში ტრამპმა განმარტა, რომ რეპერთან ერთ დროს მეგობრული ურთიერთობა ჰქონდა. თუმცა სიტუაცია დაიძაბა, როცა კომბსმა ის 2016 წლის საპრეზიდენტო კამპანიის დროს გააკრიტიკა. „მასთან მშვენივრად ვიყავი. კარგად არ ვიცნობდი, თუმცა კარგი ადამიანი ჩანდა. მაგრამ როცა საპრეზიდენტო კამპანია დავიწყე, ის ძალიან მტრული გახდა,” – თქვა ტრამპმა.
მან ასევე გაამხილა, რომ რეპერის მიერ მის მიმართ გამოთქმულმა კრიტიკამ კომბსის შეწყალება კიდევ უფრო გაართულა. „ჩვენ ადამიანები ვართ. კი, არ მოგვწონს, როცა გარე ფაქტორები ჩვენს გადაწყვეტილებებზე მოქმედებენ, ხომ ასეა? მაგრამ როცა ვიღაცას იცნობდი და მასთან კარგი ურთიერთობა გქონდა, მერე კი საპრეზიდენტო მარათონში ჩაები და მან საშინელი შეცდომები დაუშვა…არ ვიცი, რთულია. გულწრფელი ვარ და ვამბობ, რომ ამის გაკეთება გართულდა.”
President Trump reacts to media chatter of potential clemency or presidential pardons for figures like Ghislaine Maxwell, Sean “Diddy” Combs, and former Rep. George Santos. @RobFinnertyUSA pic.twitter.com/Hzd2ZaF2SA
— NEWSMAX (@NEWSMAX) August 2, 2025
კომბსი 2024 წლის სექტემბერში რეკეტისა და სექსტრეფიკინგის ბრალდებებით დააკავეს. მართალია, რეპერი ორივე მძიმე ბრალდებაში გამართლდა, თუმცა სასამართლომ ის დამნაშავედ ცნო ფედერალური პროსტიტუციის საქმეზე, რისთვისაც 50-თვიანი პატიმრობა მიესაჯა.
შობის დღეს რეპერის იურიდიულმა გუნდმა განაჩენის გასაჩივრების პროცესი დაიწყო.
