სანამ დევიდ ბოუი გახდებოდა, ის დევიდ ჯონსი იყო. ცხოვრობდა მოკრძალებულ, ტრადიციულ ბრიტანულ სახლში, სამხრეთ-აღმოსავლეთ ლონდონში, მისაღები და სასადილო ოთახებით პირველ სართულზე და ორი საძინებლით – მეორეზე. ბოუი იქ ოჯახთან ერთად ცხოვრობდა და ოცნებობდა, გამხდარიყო მუსიკალური ვარსკვლავი.
ახალი ინფორმაციის თანახმად, უახლოეს მომავალში ეს ადგილი მუსიკოსის ფანების ერთგვარ ტაძრად იქცევა – მუსიკოსის ბავშვობის სახლი განახლდება და დამთვალიერებლისთვის გაიხსნება.
სახლი, რომელშიც ბოუი 8-დან 20 წლამდე ცხოვრობდა, ლონდონის მემკვიდრეობის ფონდმა შეიძინა. რესტავრაციის შედეგად, მას 1960-იანი წლების ავთენტური ვიზუალი დაუბრუნდება, 2027 წელს კი მისი კარი გაიღება.
ბოუი ბრიქსტონში, სამხრეთ ლონდონში დაიბადა. აღნიშნულ სახლში ის მშობლებთან ერთად 1955 წელს გადავიდა და იქ 1967 წლამდე ცხოვრობდა, დაახლოებით იმ პერიოდამდე, როცა სადებიუტო ალბომი გამოსცა.
ლონდონის მემკვიდრეობის ფონდმა ახალი ამბავი მუსიკოსის 79-ე დაბადების დღეზე (8 იანვარი) და მისი გარდაცვალების 10 წლის თავამდე (2016 წლის 10 იანვარი) რამდენიმე დღით ადრე გაამხილა.
მანამდე, 2025 წლის სექტემბერში, ლონდონის ვიქტორიასა და ალბერტის მუზეუმში გაიხსნა დევიდ ბოუისადმი მიძღვნილი მუდმივი გამოფენა. ჯეფ მარში, გამოფენის თანაკურატორი, ასევე მიიღებს მონაწილეობას სახლის რესტავრაციაში აქამდე სრულიად უცნობი არქივის გამოფენასთან ერთად.
„სწორედ ამ პატარა სახლში, კონკრეტულად კი ამ პატარა საძინებელში დაიწყო დევიდ ბოუის, ერთი ჩვეულებრივი გარეუბნელი სკოლის მოსწავლის საერთაშორისო ვარსკვლავად ტრანსფორმაციის გზა,” – ამბობს მარში განცხადებაში. „როგორც თავად ბოუიმ თქვა: ‘იმდენ დროს ვატარებდი საძინებელში, ის მართლაც მთელი ჩემი სამყარო იყო. იქ მქონდა წიგნები, იქ იყო ჩემი მუსიკა, ფირსაკრავი. და ამ ჩემი სამყაროდან ქუჩაში გასასვლელად შუალედური, ნეიტრალური მისაღები ოთახის გავლა მიწევდა.’”
დევიდ ბოუის მემკვიდრეობის ფოტო
განახლებული სივრცე ასევე უმასპინძლებს შემოქმედებით ვორკშოპებს ახალგაზრდებისთვის. ფონდის განმარტებით, სახლი იქნება „მყარი საფუძველი შემდეგი თაობებისთვის” და ფოკუსირდება თვითრწმენისა და საკომუნიკაციო უნარების სწავლებაზე ხელოვნებაში.
„დევიდ ბოუი ამაყი ლონდონელი იყო. მიუხედავად იმისა, რომ მისმა კარიერამ ის მთელ მსოფლიოს აზიარა, ყოველთვის ახსოვდა, საიდან მოდიოდა და ახსოვდა ის საზოგადოება, რომელიც მას ბავშვობიდან უჭერდა მხარს,” – ამბობს ნიკოლა სტეისი, ლონდონის მემკვიდრეობის ფონდის დირექტორი. „შესანიშნავია, რომ გვაქვს ასეთი შესაძლებლობა, მოვყვეთ მის ამბავს და ახალი თაობები შთავაგონოთ. ლონდონის მემკვიდრეობისთვის ამ ადგილის შენარჩუნება უმნიშვნელოვანესია.”
საქველმოქმედო ორგანიზაცია The Jones Day Foundation სახლის განახლებისთვის 500 000 ფუნტ სტერლინგს გაიღებს. დამატებითი სახსრებისთვის იანვრიდან ასევე დაიწყება საზოგადოებრივი შემოწირულობის კამპანიაც.
ბოუი არ არის პირველი ბრიტანელი ვარსკვლავი, რომლის ბავშვობის სახლიც საზოგადოებრივ სივრცედ იქცევა. პოლ მაკარტნისა და ჯონ ლენონის სახლები ლივერპულში, რომლებიც ეროვნულ ფონდს ეკუთვნის, ასევე ღიაა დამთვალიერებლისთვის.
