კიმ კარდაშიანმა ყოფილი მეუღლე კანიე უესტი პოზიტიურად მოიხსენია. კიმმა ახალი წლის დადგომა ასპენში, კოლორადოში აღნიშნა, საიდანაც სოციალურ ქსელში ვიდეო გამოაქვეყნა. ის გამომწერებს თავის ზამთრის სამოსს აჩვენებს. კარდაშიანს ვიდეოში Roberto Cavalli-ს ტყავის შარვალი, ოქროსფერი კორსეტი, ბეწვის პალტო და Yeezy-ს ჩექმები აცვია. კიმი Yeezy-ს დიზაინს აქებს და ამბობს: „უნდა ვთქვა, Yeezy-ს მაღალქუსლიან ფეხსაცმელს არაფერი შეედრება. არ ვიცი, ეს მოდელი გამოუშვეს თუ სპეციალურად ჩემთვის შექმნეს.”
ბოლო პერიოდში კარდაშიანი კანიეს შესახებ საჯაროდ აღარ საუბრობს, თუმცა მათი ურთიერთობა, პრესაში გავრცელებული ხმების თანახმად, ახლა უფრო მეგობრულია. TMZ-ის ცნობით, უესტმა სადღესასწაულო პერიოდის ნაწილი კალიფორნიაში, კარდაშიანთან და ბავშვებთან ერთად გაატარა.
კიმ კარდაშიანი და კანიე უესტი 2014 წელს დაქორწინდნენ. შვიდი წლის შემდეგ კიმმა განქორწინება მოითხოვა და პროცესი 2022 წელს საბოლოოდ დასრულდა.
რაც შეეხება უესტს, ის კვლავ აქტიურად უშვებს Yeezy-ს სამოსს, რომლის ყიდვაც მის ვებგვერდზეა შესაძლებელი. 30 და 31 იანვარს უესტი მეხიკო სიტიში, Monumental Plaza de Toros La México-ზე გამოსვლასაც გეგმავს. შოუები, შესაძლოა, დაემთხვეს მისი არაერთხელ გადადებული ალბომის, Bully-ს გამოშვებას, რომლის რელიზის სავარაუდო თარიღიც სწორედ 30 იანვარია.
