იმანი თავისი გარდაცვლილი მეუღლის, დევიდ ბოუის ხსოვნას ახალ ტატუს უძღვნის. 10 იანვარს მოდელმა ინსტაგრამზე პოსტი გამოაქვეყნა და გამომწერებს აჩვენა ახალი სვირინგი, რომელსაც მუსიკოსისთვის მიძღვნილ სიმბოლოდ მოიხსენიებს. ბოუი 2016 წელს 69 წლის ასაკში გარდაიცვალა.
ტატუირების პროცესის ვიდეოს ქვეშ იმანი წერს: „10 იანვარი. ტკივილი არსად წასულა.”
პოსტის ფონად ბოუის სიმღერა – Subterraneans ისმის, რომელიც მის 1977 წლის ალბომში, Low-შია შესული. მიუხედავად იმისა, რომ იმანმა არ დააკონკრეტა ტატუს ზუსტი მნიშვნელობა, ტექსტიდან ჩანს, რომ ის ერთდროულად არის მოგონების და მუდმივი სიყვარულის სიმბოლო.
დევიდ ბოუი 2016 წლის 10 იანვარს კიბოსთან 18-თვიანი ბრძოლის შემდეგ გარდაიცვალა. იმანი და ბოუი ერთმანეთს 1990 წელს შეხვდნენ და ორი წლის შემდეგ, 1992 წელს დაქორწინდნენ. წყვილს 2000 წლის აგვისტოში ქალიშვილი შეეძინა.
2021 წელს ჟურნალ People-თან ინტერვიუში იმანმა ასე გაიხსენა თავისი ქორწინება: „მე თავს კვლავაც დაოჯახებულად ვგრძნობ. რამდენიმე წლის წინ ვიღაცამ დევიდს ჩემი გარდაცვლილი მეუღლე უწოდა, მე კი ვუთხარი – არა, ის არ არის ჩემი გარდაცვლილი მეუღლე, ის ჩემი მეუღლეა. ჩემი მოგონებებით, ჩემი სიყვარული ახლაც ცოცხლობს“.
კვირის დასაწყისში იმანმა ბოუის 79-ე იუბილეც აღნიშნა – ინსტაგრამზე გააზიარა მუსიკოსის შავ-თეთრი ფოტო წარწერით: „გილოცავ ზეციურ დაბადების დღეს. შენი სინათლე ჩვენს გულებში კვლავ ძლიერად ანათებს! გვიყვარხარ და გვაკლიხარ“.
ბოუი სოცუალურ ქსელში მისმა 25 წლის ქალიშვილმა, ალექსანდრია ზაჰრა ჯონსმაც გაიხსენა და მამას პოსტი მიუძღვნა.
