„ბოლო გადასხმა” – თამადა ფილმ „ლირიკას” საუნდტრეკს აზიარებს

თამადა ახალ სიმღერასა და ვიდეოკლიპს აზიარებს, სახელწოდებით „ბოლო გადასხმა”. სიმღერა ფილმ „ლირიკას” საუნდტრეკია, რომლის პრემიერაც 2025 წლის 20 დეკემბერს შედგა. კინოთეატრებში კი მისი ნახვა მაყურებელს 2 იანვრიდან შეუძლია. ფილმის რეჟისორი რეზო გიგინეიშვილია. 

„საუკეთესო ხალხი შეიკრიბა, ფილმი გადაიღეს. რეზომ დამირეკა, გიგინეიშვილმა, საუნდტრეკი იქნებოდა კარგიო – ისეთი, შენ რომ გამოგდისო. მეც არ დავაყოვნე, დავბზრიალდი უცებ და ასე ვიგრძენი,” – წერს თამადა „ბოლო გადასხმის” ვიდეოკლიპზე.

მუსიკოსთან ერთად სიმღერაში ილიკო სუხიშვილი და ნატალია ქუთათელაძეც მონაწილეობენ. 

ბილბორდ საქართველო „ლირიკას” რეჟისორს, რეზო გიგინეიშვილს ესაუბრა:

„იმ დროიდან, როცა ფილმების გადაღება დავიწყე, ჩემს ნამუშევრებს ყოველთვის ახლავს საუნდტრეკები, რომლებიც მერე ხალხში შემოდის და პოპულარული ხდება. მუდმივად ვპატიჟებ საინტერესო არტისტებს, რომელთაგანაც ზოგი მანამდეც პოპულარული იყო, ზოგიც კი სწორედ ამ სიმღერებით გაიცნო ფართო საზოგადოებამ. მაგალითად, პირველ ფილმში ეს იყო ნინო ქათამაძე, იყო ასევე უკრაინელი მომღერალი ივან დორნი, ჯგუფი „ტოკიო” და ა.შ. წარმატებული კოლაბორაციის შემთხვევაში კი ვაკეთებდით მუსიკალურ ვიდეოებსაც, რომლებიც ასევე პოპულარული ხდებოდა. ასე რომ, შემიძლია თამამად ვთქვა, რომ ჰიტების შექმნის საკმაოდ დიდი გამოცდილება გვაქვს.

საუნდტრეკზე მუშაობისას ჩემთვის მნიშვნელოვანია, რომ ეს არ იყოს ცალკე კომპოზიცია. სიმღერა უნდა იბადებოდეს ფილმის წიაღში. „ლირიკას” შემთხვევაშიც ასე მოხდა: „ბოლო გადასხხმა” ფილმის სცენიდან წამოვიდა, სადაც ილიკო მღერის, დათო ევგენიძე უკრავს, მურმან ჯინორია ტექსტს ამბობს და იქვე დაიბადა ეს იდეა. და როცა უკვე ვფიქრობდი, თუ ვინ შეიძლება ეს ყველაფერი მუსიკალურად დააგვირგვინოს, რამდენიმე მუსიკოსი მყავდა წარმოდგენილი და ერთ-ერთი იყო ლაშა – თამადა. მისი შემოქმედება ძალიან მომწონს, რადგან ეს არ არის შოუ-ბიზნესის მიბაძვა, ეს არის რაღაც ორიგინალური, დაფუძნებული აბსოლუტურად ქართულ ბაზისზე და ამავდროულად, არის განათლებული, მომზადებული ადამიანის მიერ შექმნილი. თამადას აქვს თავისი სახე და თვითმყოფადია, ამიტომაც დავურეკე ლაშას. მან კი გამომიგზავნა პირველი ჩანახატი, რომელიც ძალიან მომეწონა. მერე შევთავაზე ილიკოს ჩაწერა, რომელიც ფართო გაგებით ხელოვანია. ადრეც მიმუშავია მასთან „მძევლებზე”, ძალიან მუსიკალურია და დიდი არტისტია, რომელსაც შეუძლია, თავი ყველა სფეროში გამოავლინოს, რადგან ამ ხელოვნებას ის თავის თავში ატარებს. 

ამის შემდეგ კი გამიჩნდა იდეა, რომ ამ ყველაფერს ქალის ხმა მოუხდებოდა, რომელიც არ იქნებოდა ჩვეულებრივი ნამღერი, არამედ – კონტრასტული. ამ კონტრასტის მისაღწევად წარმოვიდგინე საოპერო ხმა და დავპატიჟე ნატალია ქუთათელაძე, რომელიც თავისი ღვთაებრივი ხმით დაემატა ტრეკს. საბოლოოდ კი, ვფიქრობ, ძალიან საინტერესო ნამუშევარი გამოვიდა დრამატურგიულადაც, მუსიკალურადაც და მადლობელი ვარ იმ შესაძლებლობის, რომ ასეთი ნიჭიერი ხალხი შეიკრიბა ამ პროდუქტის გარშემო, რომელიც ბოლოს მუსიკალური კლიპით დავაგვირგვინეთ და 2 დღეში უკვე ჰიტი გახდა.”

„ლირიკა” საახალწლო ქალაქური ამბავია არჩევანზე, მეორე შანსსა და საკუთარი თავის ხელახლა აღმოჩენაზე. მასში მთავარ როლს ოსკარზე ნომინირებული მსახიობი მიშა მესხი ასრულებს. ფილმი ასევე აერთიანებს ქართული კინოს, მუსიკისა და სპორტის გამორჩეულ წარმომადგენლებს. მათ შორის არიან: ილიკო სუხიშვილი, არჩილ და შოთა არველაძეები, დათო ევგენიძე და სხვები. 

„მინდა, თქვენს მკითხველს მივმართო – ვინც კლიპის საშუალებით გაიგო ფილმის შესახებ, ან, შეიძლება, პირიქით – ნახონ ფილმი, რომ ეს ყველაფერი ერთიანობაში მოვიდეს. დღეს დამკვიდრებული ხედვა, რომ ყველაფერი ღირებული ადრე იქმნებოდა და ახალგაზრდა თაობაში ვერავინ ვეღარაფერს აკეთებს, მითია და უნდა დაიმსხვრეს. ფილმიც იქმნება, მუსიკაც და ჩვენ გვაქვს ამის მაგალითები. ასე რომ, თუ ამ სიმღერას ფილმსაც დაამატებენ და ზოგადად, თუ აღდგება ფილმების კინოში ნახვის კულტურა, მგონია, რომ ძალიან კარგ დროს გაატარებენ.”