მუსიკოსმა მებო ნუცუბიძემ, სასცენო სახელით Mebo Renard, მუსიკალური პაუზის შემდეგ ახალი ნამუშევარი, სახელწოდებით „რამდენს” გამოაქვეყნა. მიუხედავად იმისა, რომ Mebo Renard სცენაზე აქტიურად არ ჩანდა, კულისებს მიღმა ის აქტიურად მუშაობდა. Heima Production – რომლის თანადამფუძნებელიც მებოა, The One Club for Creativity-ს 2025 წლის გლობალური რეიტინგების მუსიკისა და ხმის დიზაინის კატეგორიების ათეულში მოხვდა.
„ბოლო რამდენიმე წელია, სტუდიურ მუშაობაზე გადავერთე, ძირითადად სხვა მუსიკოსების პროდიუსინგით და პროექტებისთვის მუსიკის წერით ვიყავი და ვარ დაკავებული. წელს აქტიური გეგმით ვბრუნდები: ძალიან ბევრი ახალი სიმღერა, ვიდეოები, ლაივ სესიები და რაც მთავარია – უკვე გაზაფხულიდან კონცერტები მაქვს დაგეგმილი.” – აღნიშნავს მებო ნუცუბიძე Billboard საქართველოსთან საუბარში.
მებო ნუცუბიძე – მუსიკოსი:
„ამ პერიოდში, როცა საკუთარ მუსიკაზე არ ვმუშაობდი, მაინც ამ სფეროში ვიყავი, შესაბამისად, მთელი ეს თითქმის 10 წლიანი პაუზა საბოლოოდ ძალიან კარგად აისახა ჩემს შემოქმედებაზე: იმდენი ახალი იდეა დაგროვდა და სიმღერები დაიწერა, რომ უკვე ალბომის მასალა მზად მაქვს.
ამ კონკრეტულ სიმღერას ორი მთავარი სათქმელი აქვს:
– ყველას გვჭირდება ის ერთი შანსი.
– ჩვენ ყველანი თვითონ ვწერთ და ვქმნით ჩვენს ამბებსა და მოგონებებს.
Mebo Renard-ის ახალ სიმღერას „რამდენს“ თან ახლავს საინტერესო კონცეფციის ვიზუალური მასალაც, რომელზეც ლევან ბაბუციძემ იმუშავა, მისი შექმნილია ასევე Spotify-ის ქავერ არტიც.
„ვიდეოს იდეაზე, თვითონ ვიდეოზე და ასევე Spotify-ს ქავერ-არტზეც ჩემმა უნიჭიერესმა მეგობარმა – ლევან ბაბუციძემ იმუშავა. მასთან ერთად წინ კიდევ ბევრი კარგი ამბავია დაგეგმილი და ლევანის სახელს არაერთხელ გაიგებთ სულ უფრო და უფრო მაგარი პროექტებით. მუსიკის პროდიუსინგში დამეხმარა ლევან სიდიანი, ძალიან კარგი მუსიკოსი და რა თქმა უნდა, ჩემი მუსიკა წარმოუდგენელია ბეთხოს გარეშე: პროდიუსინგი, მიქსინგი, მასტერინგი – ბეთხოს ხელში ყველაფერი ასე კარგად და ემოციურად ჟღერს.” – მებო ნუცუბიძე.
ახალი რელიზი Mebo Renard-ისთვის შემოქმედებითი გზის ახალი ეტაპია. მუსიკოსი უახლოეს პერიოდში მსმენელს მისი შემოქმედების უფრო ინტენსიურად გაზიარებას ჰპირდება.
მოისმინეთ Mebo Renard-ის ახალი მუსიკალური ნამუშევარი „რამდენს“
